Rokstu sagataveja: portals lakuga.lv

Namaterialuos kulturys montuojuma centrs “Upīte” i “Bigmaar’s records” īrokstu studeja jaunajom grupom duovoj vareibu pīsadaleit dzīšmu konkursā, kura uzvarātuojim byus īspieja profesionali īraksteit sovu dzīsmi “Bigmaar’s Records” studejā.

Jaunuos grupys, kurys spieļoj dzeivajā sastuovā, teik aicynuotys pīsadaleit konkursā i da 25. apreļa īsyuteit sovu orginaldzīšmu programu vysmoz 20 minutu garumā. Vysys programys tiks izvārtātys, i vīnam golvonuos bolvys sajiemiejam byus vareiba īraksteit vīnu sovu dzīsmi profesionalā īrokstu studejā. Konkursa dasacejumus var syuteit Andrim Slišānam Facebook Messenger voi WhatsApp iz numeri 29621058.

Reizē ar konkursu izziņuots ari “π-dzīdam” koncerts, kas 21. junī 22.00 stuņdēs nūtiks Bolvu nūvoda Upītis stadionā. Itūreiz koncerta eipašais gosts byus Andris Kivičs ar grupys “Z-Scars” hitim, sovpus storplaikūs byus vareiba dzierdēt grupys “Unknown artist”, “Kei-rei”, folklorys kūpu “Upīte” i apvīneibu “Naktenīks i reiti”.

Andris Slišāns, kurs ir vīns nu pasuokuma organizatoru, stuosta: “Pasuokums “π-dzīdam” ir palics par tradicionalu nūtikšonu. Kod festivals tyka aizsuokts, Upītē beja rodusēs jauna grupa “Unknown artist”, ar kuru kūpā tyka izdūmuots, ka vosorā iz saulgrīžu laiku vajag sataiseit lelu festivalu stadionā. Festivals ir veļteits jaunīšim i jaunom grupom, kab kūpā sasatikt i patusēt. Pārņ mums īguoja pruotā, ka festivals nūteik jau gona ilgi, deļtam nazkas drusku juopamaina. Tai itūgod sadarbeibā ar “Bigmaar’s records” studeju organizejam konkursu dzeivuos muzykys grupom, kas izpylda dažaidu stylu muzyku, golvonuo bolva – vareiba profesionali īraksteit vīnu sovu dzīsmi. Taipoš, kab veicynuot tū, ka pīsasoka ari grupys, kas nav taišni nu Upītis voi Bolvu nūvoda, konkursa uzvarātuojim segsim ceļa izmoksys.” Andris ari dasoka, ka jaunajom grupom ir vysaidys vareibys īsaraksteit, tok vajag paleidzēt koč vīnai grupai dabuot lobys kvalitatis īrokstu, kab varbyut paraudzeit tikt kaidūs muzykys topūs. “Saīt, ka, nu vīnys pusis, mes paleidzam, nu ūtrys pusis – mums byus vaira grupu, kas uzastuos “π-dzīdam”, rūnās taida obpusieja sadarbeiba,” nūslādz Andris Slišāns.