Kulturys īsacejumi nedeļai: latgalīšu volūda “Google” tulkuotuojā, “Lampā” i Valmīrmuižā

Kulturys īsacejumi nedeļai: latgalīšu volūda “Google” tulkuotuojā, “Lampā” i Valmīrmuižā

Rokstu sagataveja: portals lakuga.lv

Juļa pyrmajai nedeļai īsacejumus portala lakuga.lv skaiteituojim sagatavejs Snorre Karkonens-Svensons, kulturvītys “Volūdu sāta” dybynuotuojs, volūdnīks i tulkuotuojs, kai ari norvegu volūdys pasnīdziejs i kaisleigs zīmeļvaļstu volūdu popularizātuojs Latvejā. Snorre itūnedeļ pīsadaleis divejuos sarunu festivala “Lampa” diskusejuos, kuruos tiks runuots par mozuok lītuotajom volūdom, tymā skaitā latgalīšu. Festivalā ari tiks atkluota virtualuo izstuode “Linguapolis”, kas ir veļteita jaunnorvegu i latgalīšu rokstu volūdys tradicejom.

Demokratejis svieteišona

Kai jau cytūs godūs itymā laikā, ari itūgod svietejam demokrateju ar sarunu svātkim “Lampa”. Festivals nūtiks Ciesīs 5. i 6. julī. Diskusejis aptver svareigus vaicuojumus i temys mums vysim ceļā iz lobuoku sabīdreibu. Temu spektrs ir plots: nu Boltkrīvejis, bierneibys i biznesa da bibliotekom, nu lībīšu, lobeja i lauku da LGBTK+ tīseibom. 5. julī nūtiks divejis diskusejis, kas saisteitys ar latvīšu volūdu i cytom mozuok lītuotajom volūdom. 14.00 “Ziemeļsala” teltī (49) nūtiks diskuseja “Mozys volūdys, lelys vareibys? Latgalīšu, sāmu i jaunnorvegu volūdys”, kurā pīsadaleis puorstuovi nu Īvara Osena muzeja Norvegejā, Veru instituta Igaunejā, Volūdu sātys i profesore Sanita Martena nu Rēzeknis Tehnologeju akademejis. Golvonuo vareiba byus pīvārsta demokratejis, stypru navaļstiskūs organizaceju i aktivys piļsūniskuos leidzdaleibys lūmai mozuok lītuotajom volūdom, akcentejūt jaunnorvegu, sāmu, veru i latgalīšu pīredzi. Itei diskuseja byus ari tīšraidē.

Tok 19.30 Finaņšu ministrejis Norvegejis teltī (39), nūtiks saruna “Muzejs kai īspiejuotuojs: rešuok lītuotūs volūdu gadīņs”, kū vadeis volūdneica Aiga Veckalne. Tī runuos par tū, kai īspiejuot volūdys lītuotuojus i kaidu lūmu muzeji var spēlēt mozuok lītuotūs volūdu veicynuošonā. Golvonuo viereiba byus pīvārsta latgalīšu i jaunnorvegu volūdai, partū ka ituo pasuokuma laikā tiks atkluota virtualuo izstuode “Linguapolis”, kas ir veļteita itom divejom mozuok lītuotajom rokstu tradicejom. A, ka vystik pīktdiņ byusi Rēzeknē, tod nūteikti ej iz bezgola svareigū diskuseju par bailem lītuot latgalīšu volūdu Rancāna pogolmā 18.00. Vaira informacejis ITE.

Publicitatis materials

Muzyka

Kaida ta tei vosora bez muzykys i festivalu! 6. julī nūtiks Valmīrmuižys etnomuzykys festivals, kur sūpluok muzykai byus guņs skulpturys, dzeja i deja, cyrka aizdavumi i zyrgi. Eipaši mani pīsaista “Laimas Muzykanti”, kas uzastuos 21.00, a pyrma tuo, 14.30 stuņdēs, uzastuos ukraiņu dzejneica Luba Jakimčuka i kūklātuoja Latvīte Cirse. Ka gadīnī dīnu pyrma festivala byusit Reigā, tod 5. julī 19.00 Volūdu sātā, Olūtu īlā 33, kūpā ar Ļubu Jakimčuku variesi satikt ari Māru Poļakovu, Māri Salēju i Lauri Veipu.

Publicitatis materials

Leita šaļtim

Itamā nedeļā ari sūla leitainu laiku. Tys ir eistais laiks izpieteit Google Translate tikū palaistū latgalīšu volūdys verseju voi kaidu nu cytu jaunpīvīnuotūs volūdu (es vēļ prīcojūs par myusu zīmeļu sābru fēru volūdu). Tei ir bezgola lela nūtikšona! Prūtams, ka rezultati nabyus ideali, bet aktivi izmontojit īspieju ziņuot par īrūsynuojumim reika uzlobuošonai. Kai ari esi uzmaneigs nu kruopnīku, kuri jau aktivi izmontoj latgalīšu volūdu ļaunim mierkim.

Karteņa nu Facebook lopys “Latgaļu humors i dzeivis gudreibys”

Print Friendly, PDF & Email