Rokstu sagataveja: portals lakuga.lv

Rēzeknis nūvoda vokaluo grupa ”Skonai” sagatavejuse apdari tautysdzīsmei “Es karā(i) nūīdams”. Jei veļteita Latvejis Breiveibys ceiņuos krytušūs pīmiņai, kai ari dzīsmei īt kluotyn aktualais viestejums Ukrainys atbolstam ceiņā par vaļsts breiveibu.

Dzīsme “Es karā(i) nūīdams” “Skonai” vadeituojis i komponistis Guntrys Kuzminys-Juknys apdarē daboj dzili emocionalu viestejumu – tys ir skaudrys stuosts par vaidu (kara) pamastom rānom, kai ari myužeiga pīmiņa tim, kuri upuriejuši sovu dzeiveibu breiveibys vuordā, viestej vokaluos studejis ”Skonai” sagataveituo informaceja.

”Kars nav beidzīs, i ari šudiņ daudzim sovys vaļsts breiveiba ir juoizceinej ar vysa augstuokū cenu. Tautysdzīsmē skaņ kai latgalīšu, tai i ukraiņu volūdys, dzīsmis stuosts izsoka myusu leidza jusšonu i atbolstu Ukrainys ceiņuos,” tai par sovu jaunuokū dorbu izasoka Guntra Kuzmina-Jukna.

Guntra, pasadolūt sovuos sajiutuos, stuosta, ka, rokstūt ituos tautysdzīsmis apdari, jei daudz pīdūmuojuse taišni par Ukrainys situaceju. Komponiste ari pastreipoj sovu gandarejumu, ka ”Skonai” jaunīši prūt ”iznest” i izprast itū dūmu. ”Kas var byut skaistuok par jaunū paaudzi, kurei dzīž par tik styprom vierteibom! Es ceru, ka tys mums liks aizadūmuot, cik lela cena ir breiveibai, cik tei mums ir trausla i cik cīši juosorgoj,” atzeimoj Guntra.

Dzīsmis videoklips ir fiļmāts Teirumnīku pūra stygā. ”Es karā(i) nūīdams” dzīd Rēzeknis nūvoda vokaluos studejis ”Skonai” dalinīki: Laura Doropoļska, Girts Ločmelis, Sigita Kuzmina, Madara Arbidāne, Kārlis Taranda, Marta Paula Sejāne, Everita Štekele i Anna Guba. Dzīsmis īroksta i miksa autors Girts Ločmelis, bet pi video struoduojs Ivars Utināns.