Rokstu sagataveja: portals lakuga.lv

Tradicionaluos dzīduošonys grupa “Saucējas” sadarbeibā ar elektroniskuos muzykys muokslinīku DJ Monsta (Uldi Cīruli) izdavuse dzīsmi “Timsā mani tautas veda”, kas apvīnoj daudzbaļseibu, elektronikys elementus i izcyluos Zīmeļlatgolys teiciejis i dzīduotuojis Margaritys Šakinys (1926–2014) bolsu, informej muziku puorstuovi.

“Timsā mani tautas veda” stuosta par meitini, kura piec kuozu atsagrīž tāva sātā, apdzīd tuos skaistumu i otkon sateik sovu saimi. Dzīsmis stuostejumā sasavej saimiskums, olkys i pīdareiba dzymtajai vītai.

“Gribiejom īpazeistynuot klauseituojus plotuok ar Margaritys Šakinys dzīsmem, deļtuo uzrunuojom sadarbeibai DJ Monstu, kuram ir pīredze elektroniskuos muzykys sapludynuošonā ar tautys muzyku,” par dzīsmis “Timsā mani tautas veda” radeišonu stuosta “Saucējas”. Skaņdorbu grupys daleibneicys sauc par suoņsūli jūs īrostajā repertuarā, kurā dominej naapdarynuotys tautysdzīsmis.

“Sadarbeiba ar tautys muzyku maņ ir cīši tyva i vysod ir prīca paplašynuot sinergeju storp elektroniskū muzyku i tautys muzyku,” akcentej DJ Monsta, kuram ir dziļa saisteiba ar tautys muzyku, dorbojutīs grupā “ZeMe” i cytūs projektūs.

Itei muzykaluo iniciativa ir daļa nu plotuoka īceru kūpuma, kas veļteits Margaritys Šakinys pīmiņai i juos boguoteiguo repertuara aktualiziešonai, gatavejūtīs teiciejis 100 godu jubilejai 2026. godā. Grupys “Saucējas” puorstuovis pastreipoj: “Margarita beja myusu pyrmuo školuotuoja – juos dzīsmis, izcyluo dzīduošonys tehnika i sirsneiguo personeiba beja pamats grupys “Saucējas” dybynuošonai.”

Dzīsmē leidza ar “Saucēju” dzīduojumu var dzierdēt ari Margaritys Šakinys bolsu, kura īroksts ir jimts nu Tautys muzykys centra arhiva. Teiciejis īroksti atrūnami ari cytūs arhivūs (Latvejis Radejis arhivā i Latvīšu folklorys kruotivis digitalajā arhivā garamantas.lv) i ir nanūviertejams resurss sevkuram, kurs grib īsavuiceit tradicionalū dzīduošonu voi papyldynuot sovu repertuaru.