Rokstu sagataveja: portals lakuga.lv

Rita Lazda ir Preiļu 1. pamatškolys latvīšu volūdys i literaturys školuotuoja. Jei vuica ari latgalīšu volūdu i ir aktiva latgalīšu volūdys i kulturys kursu “Vosoruošona” daleibneica. Septembris īzeimej školys suokumu, i vīna nu rudiņa pusis aktivitašu ir školānu ekskursejis. Rita īsoka treis vītys Latgolā, iz kurom nūteikti ir vārts nūbraukt – īpazeit Latgolys viesturi i pošim praktiski pasadorbuot. 

Skryndu dzymtys muzejs Vabalē

Skryndu dzymtys muzejs Augšdaugovys nūvoda Vabalē, kurs ir veļteits tautys atmūdys darbinīkim bruolim Skryndom, pīduovoj vairuokys muzejpedagogiskuos ekskursejis bārnim, suocūt nu pīcu godu vacuma. Vīna nu programu ir taišni latgaliskūs vierteibu apzynuošonai – “Vakariešona munā ustobā”. Ari Rita ar sovim školys bārnim taisās itymā rudinī iz tīni nūbraukt – apsavērt muzeju i Vabalis kulinaruo montuojuma telpuos sataiseit kaidu latgalīšu iedīni, taidā veidā īpazeistūt Latgolys vyrtuvi.

Ontona Slišāna Upītis kulturviesturis muzejs

Rita īsoka ar školānim apmeklēt dzejis izalauzšonys ustobu “Pīci panti”. Tei ir breineiga vareiba latgaliski īpazeit Ontona Slišāna dzeju i Latgolys namaterialū kulturys montuojumu. Pyldūt aizdavumus, juorauga tikt pi golvonuo koda, kas ļaun tikt uorā nu ustobys. Školānim taidi aizdavumi cīši pateik. Piečuok var dūtīs iz Upītis tautys nomu, kurā var īpazeit vysaidys tradicionaluos prasmis. Školānim ari pošim tī ļaun rodūši pasadarbuot, par pīmāru, nūpynūt rūkyssprādzis. 

Ludzys Nūvodpietnīceibys muzejs

Tys ir vīns nu vacuokūs muzeju Latgolā ar īspaideigu eksponatu skaitu – muzeja septeņuos ekspoziceju telpuos, Breivdobys i etnografejis nūdaļā i atkluotajuos kruotivēs izvītuotys pīcys tyukstūšys eksponatu. Tymā var na tik īpasazeit ar Ludzys viesturi, bet kūpā ari praktiski pasadorbuot – struoduot ar muolu i aust. Pi reizis Rita īsoka izstaiguot i īpazeit ari Ludzys piļsdrupys i Ludzys Romys katuoļu bazneicu.