Rokstu sagataveja: portals lakuga.lv

Ituo gods oktobrī i novembrī divpadsmit Latvejis bazneicuos izskanēs latgalīšu goreiguos muzykys cyklys “Divpadsmit lyugšonys”. Sveču gaismā varēs baudeit Ontona Matvejāna dzīsmis i goreiguos dzīsmis, kas pīraksteitys Stiernīnis pusē. 

Muziks i projekta vadeituojs Edijs Strušels par koncertu cyklu soka: “Breidī, kod gaisma myusu lūgūs naspeid tik spūži, asam radejuši cyklu, kas, carams, ness gaismu i puordūmys cylvāku sirdīs. Itymā cyklā ir lela gūdbejeiba pret muzykalū materialu, tradiceju i tuos skaniejumu, kas lykts prīškgolā. Skaņu gleznuojums, kurā tys austs, ir dareits ar lelu gūdu, raugūt atrast sevkurai dzīsmei sovu atteisteibys stuostu i vītu programā.” Edijs ari pīzeist, ka suokumā bejuse dūma tik par 12 dzīšmu klavīru aranžeju, tok idejis koncertam augušys, i saprats, ka gols golā naiztikt ari bez flautys i vokala. Koncerta cyklā kūpā ar Ediju Strušelu pi klavīru pīsadaleis ari flautiste Annija Sīle i vokaliste Aija Jermoloviča. “Vokala lūma byus drusku cytaižuoka, kai tū varātu īsadūmuot – tei byus dzīsme, tys byus ari stuosts i kluss vuords.”

Edijs ari sūlej, ka kotrys koncerts byus nadaudz cytaižuoks, kab klauseituoji, kuri gribēs apmeklēt vairuokus cykla koncertus, napīdzeivuotu atsakuortuošonu. Pasuokumus eipašus padareis ari sveču gaisma, par kuruos nūzeimi Edijs Strušels soka tai: “Sveču gaismys koncerti myusu dīnuos ir mūdē, i tys, prūtams, ir cīši interesanti, tok ite mes gribim iz tū pasavērt nu pavysam cytys perspektivys i izlītuot cytim mierkim – pyrma symta godu mozu ikonu vokorā varēja apsavērt tik sveču gaismā, sveču gaismā tu esi sasiļdeits kai ar līsmi, tai ar lyugšonu. I mes raudzeisim siļdeit sovus klauseituojus.”

Pyrmī pīci koncerti izskanēs taišni Latgolā – jau itamā sastdīnē, 4. oktobrī, Vydsmuižys Sv. Gora Romys katuoļu bazneicā, 11. oktobrī sevkurs byus gaideits iz koncertu Varakļuonu Sv. Krysta evangeliski luteriskajā bazneicā, 17. oktobrī Zylupis Jezus Sirds Romys katuoļu bazneicā, 18. oktobrī Izvolta Sv. Annys Romys katuoļu bazneicā i 25. oktobrī Viļakys Vyssvātuos Jezus Sirds Romys katuoļu bazneicā. Īīšona koncertūs par zīduojumim.