Rokstu sagataveja: portals lakuga.lv

Folklorys kūpa “Grodi” izdavuse albumu “Sudrabu smeldama”, kurā skaņ Latgolys dzīsmis i tautys muzyka, kurū “Grodi” ar etnografisku precizitati puormontuojuši sovā repertuarā. Albums papyldynuots ar teicieju personeiguos pīredzis stuostim, izceļūt Latvejis lauku dzeivuotuoju nagaistūšuos i vys aktualuos gora vierteibys. 

Folklorys kūpa “Grodi” pyrma treju godu sovu 35. jubileju svieteja koncertā “Sudrabu smeldama”, i niu ar taišni taidu pat nūsaukumu izdavuši albumu. Tuo nūsaukumā izsaceita dūma, ka gora vierteibys, kū var “pasasmeļt” nu Latvejis lauku ļaudim, ir nagaistūšys. Kai stuosta “Grodu” vadeituoja Aīda Rancāne, pyrma pīcu godu, kod bejuse pandemeja i cytaidys krizis, kūpa saprotuse, ka vajag meklēt spāka olūtus: “Dzeivis ceļā kotram nu myusu laiku pa laikam dasaīt satikt krizis, kas līk puorsavērt sovys vierteibu sistemys i identitatis pamatus. Taišni itaiduos šaļtīs vysuvierteiguokais bolsts ir sovu sakņu apsazynuošona.” Albumā plyust cauri smeļdzeigs vīglums i gaišys skumis, i dziļa gūdbijeiba pret teiciejim. 

“Grodi” dybynuoti 1987. godā i godu gaitā izkūpuši sovu skaniejumu, īsavuicejuši boguoteigu tautys muzykys repertuaru. Kūpys koncertūs vysubīžuok atsakluoj Latgolys 19.–20. godu symta mejis daudzbaļseiguo i skaneiguo tradiceja. Itūšaļt kūpys pamatsastuovā ir 14 dalinīki, bet daņču vokorūs tū papyldynoj muzykanti i doncuotuoji.

Albumā “Sudrabu smeldama” atrūnamys dzīsmis i tautys muzyka nu Latvīšu folklorys kruotivis ekspedicejom, Emiļa Melngaiļa pīrokstim, Mārtiņa Boiko veiktajim īrokstim i pošys Aīdys Rancānis personeigajiem arhivim – dzīsmis i daņči nu Bolvu nūvoda Brīžucīma, Medņovys, Viļakys, Bierzpiļs i Škilbānu pusis, Kruoslovys nūvoda Izvolta, Dagdys, Ezernīku, Ludzys nūvoda Nierzys i Mežavydu pogosta. Taipat ari Sibirejis latgalīšu montuojums, kurū sovulaik Timofejevkys cīmā īrakstejs Latvīšu folklorys kruotivis pietnīks i “Grodu” dalinīks Aigars Lielbārdis.

Muzyka sasavyn ar teicieju personeiguos pīredzis stuostim – albums papyldynuots ar vīnpadsmit audio fragmentim, kurūs atsakluoj kai sīvītis kasdīnys sūļs i gryuteibys, liktiņa kryudys, tai ari puorlaiceiga misejis apziņa i spāka olūts, audzynojūt bārnus i saglobojūt goreigū teireibu. Fragmentūs pasaruoda tūs teicieju bolsi, kurūs “Grodi” satyka sovuos vosorys nūmetnēs na tik Latgolā, bet ari Vydzemē. Tamuos jī vuoce na viņ folkloru, bet ari izzynuoja teicieju dzeivis guojumu i atzinis.

Albums īraksteits Reigys Kinostudejā i tū izdevs kulturys menedžmenta centrys “Lauska”. Albuma dizainu veiduojuši – Aurēlija Rancāne i Artūrs Analts. Tū var īsaguoduot taustomā formatā muzykys veikalūs “Upe”, “eLPee”, “Randoms” i internetveikalā lauska.lv voi ari nūsaklauseit digitali.