Rokstu sagataveja: portals lakuga.lv

2026. gods atness puormejis Latvejis Sabīdryskajā medejā (LSM) – jau dreiži durovys attaiseis LSM Latgolys redakceja Daugovpilī. Itamā nedeļā īsacejumus sagatavejuse LSM Latgolys redakcejis vadeituoja Madara Bērtiņa. Pyrma stuošonuos vadeituojis omotā Madaru zynuojom kai Latvejis Radejis Latgolys Studejis korespondenti, kas zeimoj, ka ari Madarai itys byus puormeju gods. Portala lakuga.lv redakceja Madarai Bērtiņai vielej izadūšonys jaunajā omotā, bet jei poša īsoka apmeklēt Zandys Mankopys monoizruodi “Kaķa memuāri” (Kaķa memuāri), Reiņa Zariņa koncertu i baudeit zīmys prīcys.

“Kača memuari” Daugovpilī

Maņ ir pasaveics dzeivuot piļsātā, kur ir teatris. Studejūt Vydzemis augstškolā, apmeklieju gondreiž vysys Valmīrys teatra izruodis. Puorsaceļūt iz Rēzekni, prīcuojūs par Rēzeknis Tautys teatra īstudiejumim, tok niu, kod dorba deļ regulari uzaturiešu Daugovpilī, nūteikti daudzi bīžuok gasteišu Daugovpiļs teatrī. Itūnedeļ īsoku nūsavērt Zandys Mankopys monoizruodi “Kaķa memuāri” 15. janvarī i sengreku dramaturga Eiripida tragedejis “Hekube” īstudiejumu latgalīšu volūdā 16. janvarī.

Reinis Zariņš Rēzeknē

Klasiskuos muzykys koncertus suoču apmeklēt pyrma aptyvai 10 godu, kod Rēzeknē atkluoja Latgolys viestnīceibu GORS. Juoatzeist, ka munys attīceibys ar klasiskū muzyku vys vēļ ir gona sarežgeitys – ir koncerti, kur sasajiusmynoju par kotru notu, tok ir ari koncerti, kur skaitu krāslus, kab naaizmygtu. Pianists Reinis Zariņš ir spūdrs i meistareigs, partū ar napacīteibu gaidu 18. janvari, kod “Gorā” varēs dzierdēt juo jaunuokū soloprogramu “Perts un viņa brāļi”. 

Zīmys prīcys

Voi atguodoj tuos bezryupeiguos zīmys prīcys bierneibā? Kod braucīnī ar rogovom nu augstuokuo kolna jutīs dreižuoks par Šūmaheru, bet pi sātys muorka sliduoji kai olimpiskais čempions? Jaunais gods suocīs ar snīga koponom, partū itūnedeļ obligati juogiun vyss, kū zīma pīduovoj. Iz slēpem, iz slidom, ar rogovom voi iz lelveikala maiseņa lejā nu kolna. Pagiun leidza termosu ar čaju voi korstu šokoladu i aidā baudeit zīmys prīcys! Cyta storpā, sliepuošonys trasis Sarkaņkolnā i Egļukolnā jau ir attaiseitys.