Rokstu sagataveja: portals lakuga.lv

Piec breiveibys svātku i garuoku breivdīnu otkon prīškā dorba nedeļa. Koč ari eisuo, tok četruos dīnuos juoīspiej padareit tū, kas parosti byutu īplānuots deļ pīcu dīnu, deļtam īsacejumi itūreiz par mīreigū i skaistū, baudomū i seņ nasajustū, pīmāram, muolu storp pierstim voi meilu apskuovīni sovai mamai. Īsacejumus itūreiz sagatavejuse LSM Latgolys redakcejis žurnaliste Anna Luīze Ruskule.

Darbneicys pīaugušajim

Kai jau žurnalistei, maņ reši saīt pībremzēt i vīnkuorši baudeit šaļti, deļtam jau kaidu laiku acīs beja īkrytušys Rotko muzeja organizātuos keramikys darbneicys. Muols ir par dorbuošonūs i šmukumu, par tū, kū tu rodi pats ar sovom rūkom. Bierneibā tys beja muols karjerā, pa ratam, tok veiduojom ari sovys figurenis Muola muokslys centrā 18. novembra īlā. Ka nikuo najaucu, tod 19. dzimšonys dīnā maņ paduovuoja keramikis Lilijis Zeilis veiduotū škeivi. Apbreinojamai skaists, dyumakaini malns i tik myusdīneigs.

Taišni keramike i pūdnīceibys omota meistare Lilija Zeiļa Rotko muzeja Omotu sātā pīktdīnēs voda keramikys meistarklasis. Itūreiz tuos paradzātys na tik bārnim, tok ari pīaugušajim. Deļtam aicynoju sevkuru pīktdiņ, 8. majā, 16 stuņdēs paraudzeit “pagaist muolā”.

Vystik, ka pošim nasagrib radeit, tod trešdiņ i catūrtdiņ Rotko muzejā nu 15 da 17 stuņžu keramikys simpozeja dalinīki prezentēs sovus rodūšūs portfolio.

Pagasteit Daugovpiļs teatrī

Taipoš itamā pīktdīnē Daugovpiļs teatrī otkon iz skotivis kuops Merilina Monro ci Zanda Mankopa. Herberta Laukšteina atsagrīzšona Daugovpilī ar izruodi “Reiz pilnmēness zilgajā gaismā” ir par vīntuleibu, saimis konfliktim, kas rezonej ar sevkuru nu myusu. Izruodis epicentrā ir vīntuļais tāvs Harijs ci Margers Eglinskis, kurs atrūn sovu Merilinu. Taišni jei attaisa Harijam acs, ka ir vārts dzeivuot. “Padūmuot par saimi, par mamom, par tētem i cik daudzi mes varim dūt sovom saimem,” par izruodi ir sacejuse aktrise Kristīne Veinšteina, kura, cyta storpā, ir ari sajāmuse sovu “Boņuku”. Iz teatri ir juoīt i teatris ir juobauda. Itai izruodei ir izcyls akteru kolektivs, deļtam 8. majā 18.30 stuņdēs, ka na vysi celi, tod vysmoz tik, cik zālē ir vītu, vad iz Daugovpiļs teatri.

Svieteit Eiropys i Mameņu dīnu

Breivdīnuos mes svieteisim Eiropys dīnu i ari Mameņu dīnu. Deļtam 10. majs ir juoveļtej sovom meilajom i tom, kurys mums davušys dzeiveibu i ari spāku – sovom mameņom. Itamā dīnā ir svareigs na kaids pasuokums, tok veļteitais laiks. Voi tei byutu pastaiga pa kaidu nu Daugovpiļs promenadem, kūpeigs braucīņs pi dobys voi kaida nūtikšona. Par pīmāru, Daugovpiļs Vīneibys nomā gaidoms Mameņdīnys koncerts “Ar tevi sākas no sākuma viss”. I, gols golā, piec vaļsts svātku īluos vys vēļ cīši šmukai pleivoj sorkonboltsorkonī karūgi, deļtam ari pastaiga pa skaistajom piļsātu, pogostu i voi cīmu īlom byus taišni laikā.