Rokstu sagatavejs: portals lakuga.lv

“Maja mieness zeimeigs ar vysaidom spylgtom nūtikšonom vaļsts kontekstā kūpumā – atzeimēsim kai Bazneicu nakti, tai Muzeju nakti. Bet nedeļā nu 11. da 17. maja es īsaceitu itaidus bezmoksys pasuokumus, kas na tik veldzēs dvēseli, bet ari dareis boguotoku myusu pruotu i izpratni par aktualom temom,” itai īsacejumus dasoka dzīduotuoja Ilze Grēvele-Skaraine. Jū pošu itūnedeļ varēs satikt Preiļūs voi Leiksnā ar koncertprogramu “Sirdsdziesmas”.

Izzynuot, kas latgalīšim kūpeigs ar pūlim

Ka interesej viesture i sarunys ar intelektualim ļaudim, tod juosadūd iz Latgolys Centralū biblioteku Daugovpilī, kur 13. majā nūtiks tematiskys pasuokums “Mūsu kopīgā vēsture”. Nūtikšonā viesturnīks Edvards Seliška i izdeviejs Juris Visockis dasadūrs viesturis, drūseibys i kulturys vaicuojumim, pīduovojūt daudzpuseigu skotu iz sabīdreibai nūzeimeigom temem, taipat ari prezentēs divejis izdevnīceibys “Jumava” jaunuokuos gruomotys. Vaira informacejis par pasuokumu ITE.

Muzyka, sarunys i čajs

15. majā Stabuļnīkūs nūtiks nu jau par tradiceju palykušais muzykalais čaja vokors “Nenopietni/nopietnas sarunas par dzīvi” ar, pa munam, izcylom Latgolys personeibom, kuru pīredzis, veidūkļus i nanūpītnūs jūkus ir vārts pasaklauseit, baudūt vītejūs saimineicu sagataveitūs gordumus i čaju.

Dzīsmis Dīvmuotei

Bazneicu naktī īsoku dūtīs iz Leiksnu voi Preilim, kur cīši skaistūs dīvnomūs skanēs Dīvmuotis mienešam veļteita eipaša koncertprograma “Sirdsdziesmas”, kurā skanēs vysaidu laikmatu i paaudžu muzyka, kuru obejis mokslineicys ir dzīduojušys jau nu bierneibys, īmūt iz bazneicu kotra sovā Latgolys kakteņā.

Muzyka jaunai dorba nedeļai

Ka vēļ svātdīnē, 17. majā, gribīs baudeit kulturu, tod dūditēs iz Naglim! Divi breineigu bolsu eipašnīki – soprans Elīna Spridzāne (Preiļu purpura kora dalineica) i dzīduotojs Jānis Kurševs – izdzīdos skaistu muzyku i ļaus smeļtīs spāku i gora gaismu vysai jaunajai dorba nedeļai.