Rokstu sagataveja: portals lakuga.lv

23. majā Rogovkā, Nautrānu kulturys centrā, gaidoms tautys muzykantu saīts ar nūsaukumu “Večerinka O, bļaka!”. Pyrmajūs godūs tautys muzykantu saītā pīsadaleja tik daži tyvuokuos apleicīnis muzykanti, tok niu tys ir izaudzs par pasuokumu ar daudzu tautys muzykantu i kapelu daleibu nu vysu Latgolys pušu i ari tuoļuoku vītu. Pasuokumam ir i cīši plota skateituoju auditoreja, kas aktivi atbolsta muzykantus ar daņčim, viestej vīna nu pasuokuma organizatoru, bīdreibys “Rogovkīši” vaļdis lūcekle Marija Mazure.

Muzykantu saīta nūsaukums aizjimts nu skuorda lūksnis nūsaukuma latgaliski – bļakys, pa kuru izsytūt, skaņa ir tuoli dzierdama. Tys radīs tautys muzykantu, saimis i sābru kūpejuos muziciešonys laikā Ontona Kūkuoja dzymtajā sātā, kur bļaka tyka izmontuota kai muzykys instruments, pa tū izsytūt ar pagali. Piec Ontona Kūkuoja aizīšonys myužeibā Nautrānu pogosta puorvaļde īdybynuoja tautys muzykantu saīta tradiceju.

Jau vairuokus godus piec kuortys pasuokumu organizej bīdreiba “Rogovkīši” ar Rēzeknis nūvoda Nautrānu apvīneibys puorvaļdis, Rēzeknis nūvoda Kulturys i turysma puorvaļdis i sponsoru atbolstu. Itūgod tautys muzykantu saīts Rogovkā “Večerinka O, bļaka!” svieteis 15. tuo nūtikšonu.

Tai kai tautys muzykantu saīts tyka suokts organizēt, pīmynūt dzejnīku, muokslinīku, Latgolys kulturys darbinīku Ontonu Kūkuoju, tod itūgod apmaklātuojim byus vareiba īpasazeit ar juo dailradi – dzeju, fragmentim nu lugu i skečim, kurūs publikai tautys muzykantu uzastuošonu vydā ruodeis Nautrānu pogosta Dekteru amaterteatra akteri.

Pasuokumā pīsadaleis tautys muzykanti nu Rēzeknis nūvoda, Ludzys nūvoda i Augšdaugovys nūvoda, kūpā vysmoz 15 tautys muzykantu. Taipoš ituo gods večerinkā uzastuos kapela “Sveicynojom, vielejom” (Ludzys nūvoda Saļnova), damu muzykaluo apvīneiba “Amma” (Bolvu nūvoda Brīžucīms), Vinsents Kūkuojs ar grupu “Trikmīņs” (Rēzeknis nūvods) i Kuociņu kapela (Ciesis). Pyrmū reizi pasuokumu pīskandynuos ari kapela “Kūzula muzikanti” (Rēzeknis nūvoda Dekšuoris), ansamblis “Latgales klezmeri” (Rēzekne) i Baļtinovys teatra “Palādas” muzykalī akteri (Bolvu nūvoda Baļtinova).

Nautrānu kulturtelpys īpazeišonys cyklys “Pavei, kas pi myusu!” aicynoj pyrma tautys muzykantu saīta “Večerinka “O, bļaka!”” pagasteit “Dainas dārznieku skolā”, apsavērt dailduorzu, īpazeit permakultūru i satikt saimineicys Dainu i Martu Zvejsalniecis. Apmekliejuma laiks nu 16 da 18 stuņžu, īprīšk dasasokūt (20260033, Marta). Apmekliejuma cena – 3 eiro.