Rokstu sagataveja: portals lakuga.lv

Kulturys īsacejumus itai nedeļai pīduovoj literate i laikroksta “Vietējā Latgales Avīze” žurnaliste Jana Skrivļa-Čevere. Jei īsoka daleitīs ar uobelim, škiunī klauseitīs džezu i napalaist garum Preiļu piļsātys svātkus.

Uobeli

Vysim zynomi jūceni i vysaidys memis par ituos šaļts duorza aktualitati – kabačim, kai soka – nivīnam eisti navajag i leluokajai daļai na cīši ta garšoj, tok vysim ir – taipat kai duosna sirds i daleitīs gryba ar sābrim (ite labi, ka ir pazeistams kaids, kam sātā lūpeni – kozom, vystom i citim itys duorziņs dyžan īt pi sirds). Cyta līta ar uobelim. Ka kabaci kārmanā voi sumceņā byus pagryuts paslēpt, lai puorsteigtu kaidu lobu cylvāku ar piešku pīduovuojumu, tod uobeļam izmārs pats tys. I kurs gon spēs atsasaceit nu cukureiša voi boltuo dzydruo, kam itūlaik pats soldonums?

“Škiuņa džezs”

Munā bierneibā škiunī meidejom sīnu, myusu dīnuos škiunī spielej džezu. I parkū nā? Nu 19. da 22. augusta Lūznovā nūtiks jau ostoitais Baļtejis džeza festivals “Škiuņa džezs” ar meistarklasem muzikim i koncertim ituo muzykys stila mīļuotuojim. Vaira informacejis – luznavasmuiza.lv.

Preiļu piļsātys svātki

Drupeit puorsakluos, tok izvēlis īspieja loba līta – nu 21. da 23. augusta piļsātys svātki Preiļūs. Aktivitatis, kai īrosts piļsātu, nūvodu i pogostu svātkūs, vysom gaumem, patikšonom i vajadzeibom: sporta aktivitatis (nu futbola da glīmiežu skrīšonuos saceņseibu i makšariešonys parka prūdūs), koncerti – kai šlagers i amaterkolektivi, tai Busulis i Purpura kors, kai ari goreiguos muzykys koncerts. Vēļ taidys interesantuokys i, īspiejams, nadzierdātuokys lītys kai velo reivs, Labdareibys bumbu ralejs i vēļ, i vēļ. Vuordu sokūt – izpietejit svātku programu, īkruosojit ar markīri (eistu voi telefona biļžu redigātuojā) tū, kas interesej (kai nazkod TV programuos muļtinis, “Panoramu” i “Hameleonu rūtalis”) i lai breineigs nedeļgols Preiļūs – piļsātā munā i tovā. Vaira informacejis – Preiļu nūvoda pošvaļdeibys Facebook lopā.