Rokstu sagataveja: portals lakuga.lv

Apvīneiba “Latgalīšu Reps” izdūd jaunu dzīsmi “Stajanka” – skaņdorbu par vītu, kurū kotrā mozpiļsātā pazeist sevkurs jaunīts. Tei ir benzintanka stuovvīta, kurā piec školys, dorba voi vīnkuorši taipat sasateik jaunīši, lai nūpierktu kopeju, pasarunuotu par dzeivi, pasaklauseitu muzyku i saprostu, ka vokors vēļ nav beidzīs, viestej apvīneibys daleibnīki.

Kotrā mozpiļsātā benzintanks ir tei vīta, kur nūteik pats svareiguokais. Kaids pībrauc ar mašynu, kaids jau gaida, kaids aizīt piec kopeja, i piec puora minutu stuovvīta palīk par vysys kompanejis sasapuļciešonys vītu. “Latgalīšu Reps” dzīsmē īmyužynoj mozpiļsātu jaunīšu kasdīnu bez izskaistynuošonys – spontanys sasatikšonys nakts sarunys, garlaiceibu, draudzeibu i tū eipašū sajiutu, ka, lai labi pavadeitu laiku, patīseibā navajag nikuo daudzi.

“”Stajanka” ir tei vīta, iz kurīnu nūbrauc iz pīcom minotom, bet beiguos palīc iz vysa vokora. Taiduos vītuos rūnās stuosti, kurūs piec tam var atguoduot godim,” stuosta puiši. Apvīneibys daleibnīks Ivo Grigalis pīzeist, ka jis ar draugim jauneibā sasatics Ludzā pi dūmis. Tū vītu saukuši par “Plitys”, i vēļ šudiņ jaunīši tī puļcejās. Taipat īcīneits asūt bejs ari “Viada” benzintanks.

Reizē itei dzīsme ir sova veida mozpiļsātu himna – veļtejums tim vokorim, kod nav vajadzeigs klubs, festivals voi lels pasuokums. Pīteik ar sovejim, mašynu, kopeju benzintankā i stuovvītu, kur vysod var atrast vītu vēļ vīnai sarunai.

Ar itū dzīsmi “Latgalīšu Reps” turpynoj runuot par kasdīnys dzeivi i cylvākim sev apleik, puorvieršūt naparostys situacejis muzykā, kurā sevi var atpazeit sevkurs, kurs nazkod dzeivuojs mozpiļsātā.

Dzīsmis teksta autori ir Didzis Kozlovs i Ivo Grigalis. Muzyku i tuos apstruodi taiseja Didzis Kozlovs, Ivo Grigalis, Jānis Šmēdiņš (Prime Time Studio), Matīss Repsis (tausteni) i grupys bundzinīks Rihards Špacs. Video taiseits ar muoksleigū intelektu.