Rokstu sagataveja: portals lakuga.lv

19. septembrī Bolvu nūvoda Upītē otkon sasatiks dzejis, muzykys, muokslys i latgalīšu volūdys meiļuotuoji, kab svieteitu meilys aiļu i dzīšmu festivala “Upītes uobeļduorzs” 25 godu jubileju. Pyrma tuo muzike Amanda Lapa kūpā ar festivala dybynuotuoja Ontona Slišāna unuku, muziki i tūpūšū akteri Domeniku Slišānu klauseituojim pīduovoj dzīsmi “Tovuos rūkuos”. Tuos vuordu autors ir taišni Ontons Slišāns, jaunys kompozicejis ar juo dzeju pīduovuos ari vysi “Upītes uobeļduorza” dalinīki.

Amanda Lapa stuosta: “Itei dzīsme ir sakomponāta jau pyrma 10 godu, gatavejūtīs Latgolys vacuokajam festivalam, kas nūteik bez puortraukumu, “Upītes uobeļduorzs”, kur vajadzēja izpiļdeit originaldzīsmi ar Ontona Slišāna vuordim. Arņs Slobožanins sakomponēja muzyku, tok tūreiz mes ar mārgu grupu “Piparmētra” spieliejom dzīsmei pavadejumu. Tei ir izskanējuse vysaidūs pasuokumūs, vystik nikod natyka īraksteita. Niu, maņ aktivai muzicejūt ar Slišānu saimi folklorys kūpā “Upīte”, īguoja pruotā itei dzīsme i roduos ideja tū atdzeivynuot kūpā ar Ontona Slišāna unuku Domeniku Slišānu. Domenikam ir cīši skaists i šarmants tembrys, partū ruodejuos, ka kūpeigam duetam juosaīt breineigam.”

Svātku dīna 19. septembrī Upītē suoksīs jau 17 stuņdēs Namaterialuos kulturys montuojuma centra “Upīte” 2. stuovā, kur tiks atkluota Latvejis Muokslys akademejis Tekstila katedrys studentu dorbu izstuode “Cilvēka trajektorijas” (kuratore Diāna Janušone). Izstuode pīsavierš cylvāka dzeivei kai napuortrauktai kusteibai — kermiņa i vidis, tyveibys i atsasvešynuošonys, pīdareibys i zaudiejuma vydā. Tekstils tamā puortūp emocionalā volūdā, kurā sasateik vylna, dzeja, filcs, tārauds i pat latekss. Izstuodē ar sovim dorbim pīsadola muokslineicys Ella Bogustova, Anastasija Hodarenoka, Anda Armanda Muceniece, Ilze Rukšāne, Kate Putniņa, Lienīte Slišāne, Reina Semule, Evija Stukle-Zuitiņa, Monta Beca i Annele Slišāne.

18 stuņdēs Upītis tautys noma zālē suoksīs festivala leluo koncertprograma, kurys vadeituoja lūmu itūgod uzajims akters Aldis Siliņš. Jubilejis reizē iz Upītis skotivis sasatiks i sasaveis vysvysaidi muzykys žanri i paaudzis. Svātku skaniejumu kuplynuos etnopopa grupa “Tautumeitas” i fonds “Viegli”, taipat festivala jutūni ar sovu energeju i skaniejumu pīpiļdeis “Dabasu Durovys”, FK “Upīte”, Amanda Lapa, “Kei-Rei”, Vinsents Kūkuojs i “Trikmīņs”, “Latgales Klezmeri”, “Reibums” i “Marysana Band”.

Par gūdu 25 godu jubilejai ituo gods dalinīki sagatavejuši eipašu veļtejumu festivala idejis autoram, dzejnīkam i nūvodpietnīkam Ontonam Slišānam. Kotrys muziks i apvīneiba sovā repertuarā īkļaus eipaši festivalam radeitu jaunu dzīsmi ar Ontona Slišāna dzeju. Sovutīs dzejnīku saime – Anna Rancāne, Annele Slišāne, Ilze Sperga, Mārīte Slišāne, Līvija Liepdruviete, Ineta Atpile-Jugane, Gunta Ločmele, Evika Muizniece, Rasma Svikle, Dagneja, Inga Kaļva-Minina i Arnis Bukšs – sūpluok sovim dorbim skateituojus īprīcynuos, kotrys nūskaitūt ari vīnu sev vystyvuokū Ontona dzejūli.