Rokstu sagataveja: portals lakuga.lv

Ituo gods martā ļauds Latvejā izzynuoja sāru viesti – myužeibā nūguojs kinys i teatra režisors, scenarists, akters, rakstnīks i gleznuotuojs Juoņs Streičs (1936–2026). Sovu 90 godu jubileju Streičs, kai jau pats asūt nūjauts, tai i nasagaideja, tok, kai intervejuos sacejuse juo meita Viktorija Streiča-Jakštiene, režisors gribiejs, lai juo jubileju kai eistynu dzimšonys dīnu, na pīminis dīnu svietej vysa Latveja. Partū portals lakuga.lv ir sagatavejs nūtikšonu apkūpuojumu, kuruos pīsadolūt, vysa septembra garumā kūpā varim svieteit Juoņa Streiča jubileju.

Izstuode “Jāni Streiču atceroties”

Reigys Latvīšu bīdreiba sadarbeibā ar Preiļu Viesturis i lītiškuos muokslys muzeju aicynoj apsavērt Juoņa Streiča pīmiņai veļteitū personalizstuodi “Jāni Streiču atceroties”. Izstuodē eksponāti muokslys dorbi kai nu Preiļu Viesturis i lītiškuos muokslys muzeja, tai nu privatu kolekceju. Izstuodi bez moksys da 15. septembra var apsavērt Reigys Latvīšu bīdreibys Boltajā zālē kotru dīnu nu 10 da 19 stuņžu.

Juoņa Streiča kinu vokori Preiļu pilī

4. septembrī Preiļu pilī ar kūpeigu kinys “Teātris” vieršonūs aizasuoce Juoņa Streiča kinu vokori. Nuokušais kinys vokors byus 18. septembrī, kur ruodeis kinu “Aizaugušā grāvī viegli krist”, bet trešais vokors ar kinu “Likteņdzirnas” nūtiks 25. septembrī. Beleta cena ir 5 eiro, i tūs var nūpierkt iz vītys pasuokuma dīnā Preiļu pilī. Grybātuoji var dasaceit ari gaļdeņu piļs restoranā “ViaAmore”, sasazynojūt ar 29720276.

Atraktiva i erudita komandu spēle ar sasadzīduošonu

Gūdynojūt dyžonuo latgalīša, kinys režisora, aktera i muokslinīka Juoņa Streiča dailradi, Latgolys viestnīceiba “Gors” aicynoj komandys 3-5 cylvāku sastuovā dasasaceit aktivai i eruditai komandu spēlei ar sasadzīduošonu “Jāņa Streiča mantojums”, lai prīceigā i muzykalā jutūnē maklātu atbiļdis iz vaicuojumim par Streiča biografeju, dailradi, kinom, muzyku, laikabīdrim, kinu citatim i tt.

Pasuokums nūtiks 27. septembrī, tū vadeis Ēriks Zeps, tok muzykali papyldynuos instrumentaluo grupa Mārča Lipska vadeibā, kai ari Rēzeknis i Rēzeknis nūvoda koru dzīduotuoji. Daleibys moksa komandom ir 35 eiro, bet īīšonys moksa cytim interesentim – 7 eiro. Beletus var atrast ITE.

Koncertizvadums “Mans draugs Jānis Streičs” 

Preiļūs i Reigā Juoņa Streiča 90. jubileju atzeimuos ar eipašu koncertizvadumu, kas veiduots piec poša režisora īceris. Izvaduma režisore ir juo meita Viktorija Streiča-Jakštiene, bet tymā pīsadaleis Streiča kinu akteri, tymā skaitā Gundars Ābuoliņš (Āboliņš) i Artūrs Skrastiņš, kurī veiduos stuovizruožu styla sarunu ar cytim akterim par Streiča “metodi” i juo Aizekranejis pasauli.

Streiča kinuos nūzeimeiga lūma ir muzykai, kurū veiduojuši izcyli Latvejis komponisti i kas napylda tik ilustrativu funkceju, bet palīk par nūzeimeigu dramaturgisku i filozofisku elementu. Koncertizvadumā izskanēs 15 dzīsmis nu juo kinu, kurys jaunā i laikmeteigā aranžejā puorvārtušys grupys “The Sound Poets”, “Kautkaili” i “Carnival Youth”. Taipat iz ekrana kluotyn byus ari pats Juoņs Streičs.

Koncertizvadums īcarāts kai dzeivisprīceigs veļtejums režisoram, juo dailradei i vierteibom, kas savīnoj vysaidys paaudzis. Itys projekts ir pādejais lelais Streiča režejis dorbs, kurū jis uzticiejs eistynuot da gola. Koncertizvadumu 19. septembrī varēs pīdzeivuot Preiļu kulturys nomā, bet 26. septembrī Reigā, kinys teatrī “Splendid Palace”. Beletus iz koncertizvadumim var atrast ITE.

“Žika laukuma” apmekliejums

Ka brauksit iz koncertizvadumu Preiļūs, vārts nūstuot i apsavērt ituo gods 18. julī atkluotū aktivuos atpyutys parku “Žika laukums”. Tuo nūsaukums aizjimts nu nūvadnīka, režisora Juoņa Streiča kinys “Cylvāka bārns”. Laukums simboliski atkluots režisora 90. jubilejis godā.

Laukumā byus kū dareit vysaidu paaudžu dzeivuotuojim. Tī sataiseita velotrase ar skeitparka elementim, bārnu rūtaļu zona, atpyutys vītys, lobīkuortuoti guojieju celeni, apstuodejumi, veloremonta punkts, publiskuo tualete, dzeramuo iudiņa krans i cyti infrastrukturys elementi. Laukuma izveidē īvāruoti universaluo dizaina i vidis daīmameibys principi, lai tys byutu daīmams sevkuram cylvākam.

Izstuode “Cilvēka bērns Jānis Streičs”

Taipat 19. septembrī Preiļu Viesturis i lītiškuos muokslys muzejā atkluos iztuodi “Cilvēka bērns Jānis Streičs”, kas tī byus apsaverama da 31. oktobra. Izstuodē byus radzamys Juoņa Streiča gleznys.

Bārnu i jaunīšu konkurss “Mazie kinorežisori”

Ludzys nūvoda Saļņovys pogosta biblioteka organizej zeimiejumu konkursu “Mazie režisori”, kurā pīsadaleit aicynoj bārnus i jaunīšus. Konkurss nūteik nu ituo gods 1. da 30. septembra. Muokslinīkim juoizavielej kaida Juoņa Streiča kina i sevkurā tehnikā tei juoattāloj zeimiejumā. Dorbu fotografejis ar nūsaukumu, autoru i vacumu juosyuta iz itū telefona numeri: 28 355 187 (Whatsapp voi Messenger). Rodūšuokī autori, kuri sajims puorsteiguma bolvys, tiks paziņuoti 2. oktobrī.