Rokstu sagataveja: portals lakuga.lv

Itamā nedeļā Rēzeknis nūvoda Gaigalovā nūtiks jau 30. ci jubilejis “Muzykantu saīts”, kur sasatiks vysaidi zynomi muzykanti. Partū itūreiz ar sovim kulturys īsacejumim pasadaleja riezeknīts, grupys “Ginc un Es” i vokaluos studejis “Skonai” dalinīks, kai ari muzykys producents Girts (Ģirts) Ločmelis ci Gir4a. Jis muzykys jūmā dorbojās kai Latgolā, tai ari Reigā, kur roda sovu muzyku i paleidz cytim muzykantim jūs dzīšmu veiduošonā. Ģirta īsacejumūs – disku golfs Malnovā, rudiņa virīņa recepte i, prūtams, muzykali gords vokors Gaigalovā.

Disku golfs Malnovā

Vīns nu munu jaunūs hobeju ir disku golfs, deļtuo itūrudiņ īsoku apmeklēt Malnovys disku golfa trasis. Disku golfs ir aizraunūšs sporta veids, kas pīmāruots kai īsuociejim, tai ari pīredziejušim spālātuojim. Īsuociejim i tim, kurim kasdīnys steigā ir mozuok laika, byus pīmāruota deveņu grūzu trase Malnovys koledžys teritorejā, bet spālātuojim ar leluoku pīredzi īsoku laistīs iz 18 grūzu trasi Malnovys muižys parkā “Zīdūņs”. Tei ir breineiga īspieja pavadeit laiku svaigā gaisā, baudeit rudiņa kruosys i aktivai atsapyust.

Eistyns rudiņa virīņs

Ūtra līta, kū īsoku īspēt padareit rudinī, ir kirbu kremzupys ci virīņa pagataveišona. Tū izdareit ir dīzgon vīglai, i tei ir cīši, cīši gorda.

Recepte: vysupyrma smolkai sagrīž casnāgu i burkuonu, paleluokūs kubeņūs sagrīž kirbi i suoc cept svīsteņā kotlā, kurā vuoreisi zupu. Cikom duorzini capās, kubeņūs sagrīž buļbi. Kod duorzini ir nadaudz pasacapuši, tūs puorlej ar iudini i davīnoj sagrīztū buļbu i vystys buļjonu. Vuorej, cikom duorzini ir piļneibā meiksti. Piec tuo vysu sablendej, davīnoj garšvīlys, soldonū kriejumu i vēļreiz aizvuorej da pyrmūs burbuļu. Pasnādz ar sareivātu sīru i sagrauzdeitu bageti. Tys ari vyss – lai labi garšoj!

Muzykala atpyuta Gaigalovā

Trešuo līta, kū īsoku, ir itymā nedeļgolā apmeklēt “Muzykantu saītu” Gaigalovā i tī satikt ari mani. Tys byus jau itū pīktdiņ, 2. oktobrī, deveņuos stuņdēs vokorā Gaigalovys kulturys nomā. Tymā uzastuos Latgolā īmeiļuoti i zynomi muokslinīki, tymā skaitā ari es ar tēti Gintu Ločmeli grupā “Ginc un Es”. Vaira informacejis ITE.