Roksta autore: Amanda Anusāne, portals lakuga.lv

3. i 4. septembrī Katalonejā, Barselonā, nūtyka COST (European Cooperation in Science and Technology) teikla PLURILINGMEDIA seminars, kura tema beja digitaluo satura veiduotuoju monitorings mozuok lītuotajuos volūduos. Seminara golvonais mierkis beja izpieteit, kai mozuok lītuotuos i minoritašu volūdys var nūstyprynuot sovu byušonu kluotyn digitalajā vidē, izmontojūt satura veiduotuojus, datus, institucionalū atbolstu i kūpīnu sadarbeibu. Divejis dīnys 16 seminara dalinīki nu frizu (Nēderlande), katalaņu (Spāneja), basku (Spāneja), latgalīšu (Latveja), kašubu (Pūleja), īru (Īreja), velsīšu (Velsa, Lelbritaneja), galisīšu (Spāneja), vuocu i ladinu (Dīnavydtirole, Italeja), silezīšu (Pūleja) volūdu kūpīnu apsamaineja pīredzē i pasadaleja ar situaceju jūs vaļstīs i volūdu kūpīnuos. Seminarā pīsadaleju ari es i puorstuovieju RTU Rēzeknis akademeju i latgalīšu kulturys kusteibu “Volūda”. Itymā rokstā pasadaleišu ar golvonajom atziņom nu seminara, īskiciešu situaceju cytuos kūpīnuos, kai ari apvaicuošu satura veiduotuojus nu Latgolys, parkū jī veidoj voi naveidoj saturu latgaliski.

Vysuleluokuo prīca i puorsteigums ir Katalonejis pīmārs. Ir aptyvai 7 miļjoni katalaņu volūdys lītuotuoju. Digitalais saturs katalaņu volūdā suokumā atsateisteja kai volūdys aktivismys. Piec YouTube pasaruodeišonys 2005. godā veiduotuoju beja saleidzynūšai moz, bet 2020.-2021. godā, kod pasauļs pīdzeivuoja Covid-19 pandemeju, tūs skaits cīši pīauga i TikTok algorytmys suoce vaira ruodeit saturu katalaņu volūdā. Niu tys puoraudzs plotā ekosistemā. 2025. godā tyka saskaiteits vaira nakai 1200 aktivu satura veiduotuoju, kas kūpā sasnēdze 2,8 miļjardus skatejumu. Tuo atteisteibā īsasaisteja na tik poši satura veiduotuoji, bet ari medeji, vaļsts institucejis, piļsūniskuo sabīdreiba i uzjāmumi. 

Jī ir izveiduojuši platformu La Llista, kas apkūpoj i monitorej Katalonejis satura veiduotuojus. Itūšaļt identificāts vaira nakai 1400 satura veiduotuoju katalaņu volūdā. Itei platforma tyka prezentāta kai pīmārs, kai ar datim īspiejams analizēt i kartēt digitaluo satura veiduotuoju ekosistemu. Daudzi tyka runuots, voi taida platforma byutu vajadzeiga, adaptejama i paleidzātu cytu mozuok lītuotūs volūdu satura veiduotuojim. Vīnys atbiļdis tam nav. Kaidu volūdu kūpīnu puorstuovi pīkryta, ka itaida platforma veicynuotu satura radeišonu jūs volūdā, cyti saceja, ka tei vaira varātu kolpuot pietnīcyskim mierkim i situacejis apzynuošonai. Cyti otkon saceja, ka jūs volūda ir puoruok moza i itaida platforma nabyutu efektiva. Taipat izskanēja idejis, ka vysom mozuok lītuotajom volūdom varātu byut vīna platforma, kurā satura veiduotuoji varātu atrast cyts cytu i taidā veidā mudynuot jaunus influencerus taiseit saturu jūs mozuok lītuotuos volūdys kūpīnā.

Katalaņu satura veiduotuoju nūzare teik ari publiski atzeita. Vīns nu pīmāru ir kasgadeja Premis CRIT bolva, kas izceļ i popularizej ituos volūdys satura veiduotuojus. Ceremoneja jau ūtrajā reikuošonys godā puļcēja vaira nakai 1000 cylvāku i tyka puorraideita nacionalajā televizejā. 

Taipat Barselonā ir izveiduota jauna digitaluos jaunradis infrastruktura taišni satura veiduotuojim katalaņu volūdā, kū atteistej Barselonys piļsātys pošvaļdeiba. Taidā veidā teik maklāti sadarbeibys modeli vaļsts īstuožu i privatuo sektora vydā, kai ari nūdrūsynuota publiska telpa, kur satura veiduotuojim sasatikt. 

Zynoms, ka aktuals ir ari vaicuojums, voi, veidojūt saturu mozuok lītuotajā volūdā, var nūpeļneit? Nu seminara dalinīku izskanēja aptuvanī skaitli, par pīmāru, Katalonejā tikai nu satura veiduošonys dzeivoj ap 2 % satura veiduotuoju, bet daudzim tys ir kai papyldu peļnis olūts. Īrejā ap 100 satura veiduotuoju peļnej nu satura veiduošonys īru volūdā. Kašubim tys varātu byut tikai vīns satura veiduotuojs, kas peļnej nu satura veiduošonys. Cytim – nivīns. 

Koč i Katalonejā radzama pozitiva attīksme pret satura veiduotuojim katalaņu volūdā, par pīmāru, sadarbeibom ar digitaluo satura veiduotuojim atsasauc muzykys festivali, futbola klubi, apdrūsynuošonys firmys, restorani, veikali i cyti uzjāmumi. Na tik vītejī, bet ari storptautyskī. Tok katalaņu satura veiduotuoja Laura Grau, kas sajāmuse Premis CRIT bolvu i kurai Instagram platformā ir vaira nakai 67 tyukstūšys sekuotuoju pīzeist, ka vystik ari niu vītejī uzjāmumi skaita, ka leluoku auditoreju var sasnēgt ar saturu spāņu voi angļu volūdā. Tys vys laikam asūt par tū, ka uzjāmumi tai cerej vaira pīsaisteit turystus. Anna Kostjukeviča (Kościukiewicz) i Arturs Jablonskis (Artur Jabłoński) nu “Radio Kaszëbë” ari pīzeist, ka vītejūs uzjāmumu attīksme pret reklamom kašubu volūdā nav pozitiva, tok, par pīmāru, lelī uzjāmumi, kai “Ford”, ir atvārti reklamom kašubu volūdā. Ari maņ pošai bejuse leidzeiga pīredze ar vīnu veikalu teiklu Latvejā, kurs napīkryta reklamys saturam latgaliski, kam juo zeimyna volūda asūt latvīšu literaruo. Tok cyts klients vys deve leluoku rodūšū breiveibu, tymā skaitā ari latgalīšu volūdys izmontuošonā.

Taipat daudzi tyka sprīsts ap tū, kaidus kriterejus izveiduot i kas tod skaituos satura veiduotuojs konkretajā mozuok lītuotajā volūdā. Cik procentuali profilā saturam juopasaruoda, lai cylvāku pīskaiteitu pi konkretuos volūdys kūpīnys satura veiduotuoju? Voi, par pīmāru, satura veiduotuojs, kurs publicej vīnu video godā konkretajā volūdā, skaituos tuos volūdys satura veiduotuojs? Voi cylvāks, kurs veidoj saturu par īru volūdu i kulturu, bet angliski, skaituos īru satura veiduotuojs? Cik sekuotuoju jam juobyut? Voi tei ir tikai privata voi ari juridiska persona? Itaidi i cyti vaicuojumi ar navīnnūzeimeigom atbiļdem tyka aktualizāti seminarā. Partū konkretus ciparus, cik kurā volūdā ir satura veiduotuoju, ir gryuši nūsaukt, bet skaitli aptyvai, ir itaidi: 18 frizu, 109 basku, 30 kašubu volūdā. Latgalīšu volūdā es uzskaiteju ap 10 influenceru, tok taipat nu saroksta nasagrib izslēgt uzjāmumus, īstuodis, deputatus, muzikus i cytus profilus, kuri socialūs medeju platformuos komunicej latgaliski, bet varbyut nasaskaita influenceri. Taipat seminarā izskanēja jūks, ka, pajamūt stryktus kriterejus, satura veiduotuoju skaits dažuos volūduos varātu nūkrist ari da 0.

Beiguos grybu pīkrist Velsys puorstuovam Rhodri ap Dyfrig, kurs ar prīcu verās iz katalaņu pīmāra, kurī ir lelu sūli prīškā cytom mozuok lītuotajom volūdom, ka mums ir iz kū tīktīs. Turu nūceju, ka latgalīšu volūdai ari vyss vēļ ir prīškā. Tok, lai par tū sprīž i runoj poši latgaliskuo satura veiduotuoji i ari tī Latgolys influenceri, kurim latgaliskuo satura veiduošona nav prioritate. Zamuok apvaicuoju pīcus satura veiduotuojus, lai nūskaidruotu jūs redzīni, kas ir tei motivaceja voi īmesli, parkū jī taisa voi nataisa saturu latgaliski, kai ari izzynuotu, kas ir leluokī izaicynuojumi.

Just me ci Maruta Karačkova:

“Satura veiduošona suocēs naapzynuotai i bez nūdūma 2024. godā. Pagaidom asu aktiva tikai TikTokā. Suokumā taiseju video latvyski, bet ar laiku puorguoju iz latgalīšu volūdu, i niu 90 % nu muna satura ir latgaliski. Maņ pošai tai ir vīgļuok, meiluok i ruodīs, ka ari nasamuoksluotuok. Asu auguse latgalīšu saimē, da školai runuoju tikai latgaliski. Apsazynoju, ka latgaliskais saturs nabyus tik populars, bet es ari sevi nasaucu par satura veiduotuoju, es vīnkuorši dolūs sovuos emocejuos, sajiutuos, atmiņuos, pīdzeivuojumūs. Veidoju taidu kai sovu atmiņu kladi voi dīnysgruomotu TikTok formatā.

Es ari sajamu atgrīzeniskū saiti nu sekuotuoju, ka tys ir forši, i vieliejumus, lai turpynoju dareit latgaliski. Cylvākim, kas nasaprūt latgaliski, pateik, kai itei volūda skaņ. Es skaitu, ka leluokais izaicynuojums ir īsadreikstēt i turpynuot tū dareit tai, kai jiuti i pateik. Es naskrīnu piec skatejumu, grybu palikt poša i runuot par tū, kas maņ svareigs, na tū, kū izmīdz sabīdreiba. Ir jau ari tai saucamī heiteri, kam latgaliskais kreit iz nervu, jo, pa jim, mes gribim izaceļt i byut eipašuoki. Tok kūpumā cylvāku attīksme ir pozitiva. Radzu, ka socialajūs medejūs pasaruoda ari cyti latgaliskuo satura veiduotuoji, redzīs, ka niu tei ir ūdzeņa, na tai, kai agruok, kod latgalīši kaunejuos, jo tyka izsmīti par sovu čangaļu akcentu.

Cikom runuosim latgaliski, volūda ari sasaglobuos. Es latgaliski runoju i nasakautreju, tok raksteit pareizi namuoku. Grybātūs jau īsavuiceit ari rokstu volūdu – napagaisynuot latgaliskū i nūdūt tū tuoļuok ari sovim bārnim, mozbārnim. Es skaitu, ka latgaliskajam saturam ari ir ītekme. Vystik internets ir plots i kotram ir vareiba izavēlēt, kū vērtīs i klauseitīs. Es poša ari patiereju latgaliskū saturu. Maņ nav bejušys daudzys sadarbeibys, bet tom, kurom asu pīkrytuse, vysleidz vaicoju, voi varu taiseit reklamu latgaliski. I atbiļde parosti ir pozitiva, jo taišni volūdys īmeslis ir kolpuojs par mane izalaseišonu. Tok reklamēt latgaliski ir izaicynojūši, jo na vysi saprūt, sasamazynoj ari skatejumu skaits, da kuo tei reklama i dūma teik.”

Sintija Velme:

“Pyrma kaidi pīci godi internetā īlyku video latgaliski, kur stuosteju, ka navaru pīlaist mašynu, i saprotu, ka cylvākim ir interese, kai ta ite, Latgolā, ļauds runoj. Tai vyss i aizguoja. 80 % muna satura ir latgaliski, lai puorejī apsazynoj, ka tai cylvāki Latgolā ari runoj, jo daudzim jau ir redzīņs, ka itū volūdu Latgolā vaira nivīns naizmontoj. Munā pusē jaunīši latgaliski narunoj, bet, kai pabraucu 10 km iz cytu pusi, tī runoj tikai latgaliski. Daudzi ari kasdīnā mani dzierd, runojūt latvyski, i, kod es komuniceju latgaliski, tod dūmoj, ka es uovejūs.

Es kai satura veiduotuoja sadarbeibys i atbolstu eisti namekleju, doru tū sovai prīcai. Daudzi pīduovoj reklamys, bet es pajamu moz, jo nagrybu, lai muns konts puorsavierš par reklamys kanturi. Maņ pošai cīši napateik, ka influenceri puorīt iz reklamom, jo tai pagaist pats cylvāks. Taidim influencerim es atsekoju, jo maņ nav interese vērtīs reklamys. Maņ ir puora sadarbeibys partneru, i jim pateik, ka es jim pīsaistu latgaliski runojūšu auditoreju i tū, kura ar interesi klausuos itū volūdu, jo taidu ir daudzi i vysā Latvejā. Taipat es asu patīsa i soku tū, kū eistyn dūmoju par konkretū produktu. Sadarbeibys piec es nasataisu maluot sovai auditorejai. Kod es aizsuoču taiseit saturu latgaliski, tod tys vēļ nabeja populari, tok niu radzu, ka arviņ vaira cylvāku suoc komunicēt latgaliski, eipaši TikTokā.”

Daiga Laizāne:

“Apzynuotai taiseit saturu socialajūs medejūs suoču pyrma kaidu 10 godu, kod suoču vuiceitīs dīdžejinga prasmis. Saprotu – ka es grybu tikt iz leluokim pasuokumim, klubim, kuozom, tod maņ sevi vajag reklamēt. Bet laiks īt, dzeive, interesis i vierteibys mainuos i, puorsaceļūt nu Reigys iz Rēzekni, saprotu, ka vaira grybu ruodeit sovu kasdīnu i prasmis digitaluo marketinga nūzarē. Niu ir paguojuši treis godi piec tuo, kai nūzoga munu īprīškejū Instagram profilu. Tod es beju pajāmuse pauzi nu socialūs medeju, bet vys tik beiguos atsagrīžu atpakaļ. Niu jau kai Daiga Laizāne, na kai DJ Deila, kas beja muns skotivis vuords. Izveiduoju ari TikTok profilu, i niu raugu regulari veiduot saturu, jo radzu ari atgrīzeniskū saiti. Maņ tys pateik. Es poša daboju daudzi vierteiga nu cylvāku socialajūs medejūs, kai ari raugu īdvasmuot cytus.

Saturs latgaliski munūs profilūs pasaruoda reši i moz, jo muna sarunvolūda ir latvīšu volūda, jamā es ari dūmoju, partū maņ vīgļuok izasaceit latvyski. Taipat es namuoku gramatiski pareizi raksteit latgaliski, i es vys tik grybu ruodeit tū pareizū rokstu volūdu. Vystik jiutu, ka maņ ir ari nalela volūdys barjera. Vēļ maņ gribīs ap sevi puļcēt leluoku auditoreju, i latgalīšu volūda nav vysim zynoma. Kūpumā jau es asu taisejuse saturu latgaliski, tū dareju pamatdorbā, kod struoduoju Latvejis Radejis Latgolys studejā (niu Latvejis Sabīdryskuo medeja Latgolys redakceja). Es skaitu, ka treis leluokī izaicynuojumi latgaliskuo satura veiduošonā ir pareiza gramatika, volūdys prasmis i tys, ka preteimā kaids da golam var nazkū nasaprast.

Nu pīredzis soku, ka cylvākus interesej latgaliskais saturs, ir ari īsaiste. Tai kai latgaliskuo satura ir moz, tod tei ir taida kai luksusa līta. Vysulobuok struodoj video formats, kur ir cylvākstuosti, humors i kaidys volūdys pavuiceibys. Runojūt par platformom, eisti nav taidys vīnys, kur latgaliskais saturs aizītu vaira, bet kotrai ir sova specifika i auditoreja.”

Oskars Cūkmačs:

“Sovus stuostus līku TikTokā i Instagramā. Doru tū latgaliski, jo pats asu latgalīts i grybu, lai cylvāki naaizmierst par itū volūdu, tai ari jū popularizeju. Eipaši grybātūs, lai regiona mārūgā tū vuiceitu školuos. Varātu vaira sadarbeibu ar latgalīšim, grybātūs, lai mes nazkai saītu kūpā i socialajūs medejūs pasaruodeitu vaira satura latgaliski. Pagaidom maņ nav sadarbeibys partneru. Kū pats grybu, tū līku, naudu napeļneju, bet doru tū prīcai. Maņ nav taidu izaicynuojumu, kas traucātu taiseit saturu latgaliski. Puorsvorā nu cylvāku sajamu pozitivu atgrīzeniskū saiti. Vīns ūtrys, prūtams, pīroksta kaidu komentaru, parkū narunoju latvyski. Vaira nakai 12 godu es jau dzeivoju Anglejā, bet ir plāns atsagrīzt atpakaļ. Kai soka – godi īt i valk iz sātu, eipaši iz Rēzeknis nūvodu. Ka byutu iz vītys, cīši grybātūs tiktīs ar latgalīšu kūpīnu, na tik sābrim, draugim i saimi. Grybātūs turpynuot atteisteit latgaliskū.”

Lauris Zalāns:

“Saturu suoču veiduot 2016. gods golā. Suokumā deļ “Ghetto Games”, a piec tam, kod saprotu, ka tys struodoj, tod izdūmuoju, ka vajag taiseit ari sev. Nu 2017. gods suoču aktivuok i aktivuok tū dareit. Reizem publiceju saturu ari latgaliski. Cylvākim, kurim tei nav dzymtuo volūda, puorsvorā pateik. Jī smejās leidza, jim tys ruodīs interesanti. Bīži ari prosa, lai taisu vēļ i vara, lai taisu ar specifiskim vuordim, bet ari nu sovejūs ir lels atbolsts. Latgalīšim ari ir lela prīca, ka cylvāks, kuram socialūs medeju platformuos ir vaira sekuotuoju i taidu, kas nav saisteiti ar Latgolu voi latgaliskū, ka jis pastuosta par latgalīšu volūdu.

Maņ nav vīnys atbiļdis iz vaicuojumu, parkū nataisu saturu tikai latgaliski. Vīns ir partū, ka vystik muna pyrmuo volūda ir latvīšu literaruo, ūtrei – latgalīšu. Taipat kasdīnā puorsvorā doru i runoju latvīšu volūdā, i tys automatiski nūteik latvyski, bet es cīši prīcojūs, ka ir vareiba voi idejis dareit nazkū latgaliski. Lai ari 98 % sekuotuoju pateik latgaliskais saturs, vys tik atsarūn tī 2 %, kas tū nasaprūt voi kam tys nainteresej. Par pīmāru, reizem ir kaids sadarbeibys partners, i maņ ir kaida ideja latgaliskajam saturam, bet jis aiz tuo, ka vysi nasaprūt latgaliski, nagrib, lai taisu video latgalīšu volūdā. Leluokais izaicynuojums ir tys, ka latgalīšu volūda nav deļ vysu, tai ir sova niša. Koč i gribīs ceret, ka vysim pateik, vysi grybātu klauseitīs, redzēt, bet vystik tai nav. Ir ari gadīni, kod maņ video vajadzēja puortaiseit aiz tuo, ka sadarbeibys partners nanūgiun tū ideju i nagrib latgaliskuo. Nagrib saisteitīs ar latgaliskū voi nagrib, lai es ar tū saistūs. Gribīs jau pīruodeit, ka, ari nasaprūtūt latgaliski, var sataiseit breineigu saturu vysim, bet tys ir izaicynuojums. Pagaidom maņ nav atsarads nivīns partners, kurs byutu pīduovuojs sadarebibu tik aiz tuo, ka taisu saturu latgaliski. Ir bejs tikai ūtraiži, ka es pīduovoju. Bet ar pasuokumu vadeišonu voi cytim projektim gon ir ūtraiži.

Kod taisu video latgaliski, maņ ir taids latgaliskais tāls, kurs komentej iedīņus, nūtykumus apleik. Tys cylvākim cīši pateik. Bīži jaunīši iz īlys mani atguodoj nu kaida video, kur es latgaliski asu nūkomentiejs kaidu iedīni. Jim īsasāst golvā, par pīmāru, vuords “guļbišnīks”, jī redz mani i soka “o, guļbišnīki, guļbišnīki”. Bet ir loba atgrīzeniskuo saite. Ļauds prīcojās, partū gryuši saprast tūs, kurī soka, ka latgaliskais nivīnu nainteresej. Konstanti naasu taisejs video latgaliski, partū gryuši sprīst, kaida byutu reakceja, ka es ilgtermiņā taiseitu saturu latgaliski. Cylvākim pateik dažaideiba, tys ir muns nūvāruojums, partū jei ari pasaruoda munā saturā.

Lai ari nasagrybātu tū saceit, bet vys jau, ka taiseitu saturu tikai latgaliski, es nabyutu tī, kur asu niu. Kasdīnā es struodoju taidus dorbus, kas paradz izmontuot latvīšu literarū volūdu. Oficialuo vaļsts volūda nav tik iz papeira, tei ir ari vysur cytur publiskajā telpā, tei ir juomuok i juoizmontoj.

Es dūmoju, ka latgaliskuo satura veiduotuojim byutu kaids finansials, materials voi cyta veida institucionals atbolsts, byutu vaira latgaliskuo satura veiduotuoju. Atbolsts vysod ir tys, kas vierzej iz prīšku. Tai var ari veiduot kvalitativuoku saturu i atteisteit tū, lai latgaliskuo satura byutu vaira. Taiseit saturu latgaliski mani motivej kaidi leluoki nūtykumi, kas nasabeidz tik ar Latgolys rūbežim, bet nas ari Latgolys vuordu tuoļuok. Ari leluoka īsadzilinuošona latgaliskajā i vide. Par pīmāru, kod aizbraucu iz laukim i doru lauku dorbus, tod tys vyss ari nas sevī tū latgaliskū. Maņ redzīs, ka latgaliski ir par daudzi taida statiska satura, kod ir tik stuoviešona pret kameru i runuošona. Datryukst skeču, humora i prīceiga satura.

Ar latgaliskuo satura taiseišonu na kurs kotrys varātu peļneit, itys atsatīc ari iz latvīšu literarū volūdu i cytu volūdu. Ir juobyut atbiļdei iz taidim vaicuojumim, kai, kurs mani vērsīs, ar kū es atsaškieršu, kas ir muns saturs. Juobyut harizmai i regularitatei. Tys nūteikti otkon byutu nišys saturs, bet tū nišu varātu lauzt. Repere Ūga, “Latgalīšu Reps”, par pīmāru, tū dora car repu. Tys ir pīmārs, ka latgaliskais var izskanēt ari uorpus Latgolys. Parkū i influencers tū navarātu izdareit?”