Rokstu sagataveja: portals lakuga.lv

Rudiņs ir eistais laiks, kab izītu nu sātys, izbaudeitu Latgolys kruosys i atrostu ari kaidu jaunu īmesli nūbraukšonai iz vītu, kur kasdīnā varbyut ceļš tik bīži nanūvad. Itūreiz Kuorsovys kulturviesturis centra “Līču mājas” vadeituoja Inta Jurča īsoka izbaudeit zalta rudini Kuorsovys pusē – ar kinu Saļņovā, skotim Nūmierņā, disku golfu Malnovā i atsagrīzšonu pi rūkdorbu “Līču mājās”.

Nūsavērt “Uļu” Saļņovā i pi reizis nūbraukt iz Nūmierņu

16. oktobrī 18 stuņdēs Saļņovys kulturys nomā varēs nūsavērt Vīstura Kairiša filmu “Uļa” – stuostu par Uļjanu Semjonovu nu myusu dīnu Augšdaugovys nūvoda Maduma pogosta, kura izauga par vīnu nu pasaulī izcyluokūs basketbolistu. Tys nav tik stuosts par sportu – kina runoj ari par pīaugšonu, identitati, pīdareibu i ceļu iz sovu vītu pasaulī.

Ka jau ceļš vad iz Saļņovys pusi, īsoku izbraucīni suokt agruok i pi reizis aizbraukt iz Nūmierņu. Tuos vaļņs ir vīna nu tūs vītu, kur zalta rudini var izbaudeit pa eistam – ar mežim, plašim skotim i klusumu apleik.

Nu 20 metru augstuo skotu tūrņa var pasavērt iz apleicīni i apmeklēt vidis objektu “Uguns”. Tikai juoīvāroj, ka kūka laipa nu stuovvītys iz skotu tūrni itūšaļt ir slāgta, deļtuo pi tūrņa juobrauc pa cytu pībraukšonys ceļu nu autoceļa P48. Tai var pavadeit skaistu rudiņa dīnu – nu suokuma Nūmiernis kruosys i pastaiga, a vokorā – kina Saļņovā.

Izstaiguot Malnovys parku i nūslēgt disku golfa sezonu

Rudinī ir vārts izstaiguot ari Malnovys muižys parku. Vacī kūki, alejis i rudiņa kruosys itū vītu padora seviški skaistu, bet 17. oktobrī ir vēļ vīns īmeslis braukt iz Malnovu.

11 stuņdēs disku golfa laukumā “Zīdūņs” sporta klubs “Kuorsova” reikoj sezonys nūslāguma saceņseibys “Lelīs aplis”. Pīsadaleit var kai pīredziejuši spālātuoji, tai tautys klasis dalinīki, deļtuo tys var byut ari īmeslis paraudzeit disku golfu tim, kuri da šam tū vēļ nav darejuši. I, ka jau esi Malnovā, naaizbrauc iz reizis paceli – izmet leikumeņu caur parku, apsaver muižys apleicīni i izbaudi rudiņa kruosys.

Atsagrīzt pi rūkdorbu “Līču mājās”

Rudiņam pīstuov ari vokori, kod gribīs pajimt rūkuos adekli, dīgus, kruosys voi kaidu cytu materialu i kū radeit pošam. Paguojušajā nedeļā Kuorsovā atsasuoce rūkdorbu sezona. Pyrmais saīts beja par sasatikšonu, idejom i īdviesmi jaunajai sezonai – pi sylta čaja tyka ruodeiti sovi padareitī dorbi, pasadaleits ar idejom i izrunuots, kū itūgod grybātūs īsavuiceit voi uzmeistaruot.

Bet jau 15. oktobrī 17 stuņdēs “Līču mājās” paradzāta nuokušuo rodūšuo sasatikšona – rūtu darynuošona kūpā ar Loreti Kivli. Varbyut rudiņs ir eistais laiks, kab na tikai vērtīs, kai doba maina kruosys, bet ari pošim atsagrīzt pi kuo daiļa radeišonys.