Rokstu sagataveja: portals lakuga.lv

Komunikacejis i marketinga studeja “Sistering” pyrmū reizi ir sagatavejuse Latgolys zeimynu komunikacejis auditu, kura rezultati tyka publiskuoti 28. oktobrī Preiļu pilī. Audits atkluoj 100 regiona zeimynu komunikacejis stypruos pusis, izaicynuojumus i izaugsmis vareibys, viestej studeja “Sistering”.

Kab dabuotu vysapjamūšu prīškstotu par Latgolys zeimynu komunikaceju i atpazeistameibu, pietejumā apvīnuots naatkareigu nūzaris ekspertu viertiejums i Latgolys dzeivuotuoju aptauja. Zeimynus viertēja pīci eksperti: Edeite Laime, Raimonds Platacis, Ginta Salmane, Gunta Trokša i Regita Zeiļa. Pietejumu eistynuoja komunikacejis i marketinga studeja “Sistering” sadarbeibā ar Latgolys plānuošonys regionu i RTU Rēzeknis akademeju. Dzeivuotuoju aptauju veice pietejumu agentura “Berg Research”.

Pietejums atkluoj, ka Latgolys zeimynim vysulobuok pasadūd sovys identitatis i stuosta veiduošona, sovpus lels izaicynuojums ir vīnuotys i konsekventys komunikacejis eistynuošona. Pīci naatkaregi nūzaris eksperti, viertejūt zeimynu komunikaceju pīcu punktu skalā, vysuaugšuok nūviertiejuši zeimyna pozicionejumu i stuostu (videji 3,26 nu 5), tok vysuzamuok – integrātū marketinga komunikaceju ci spieju veiduot vīnuotu i saskaņuotu komunikaceju vysaidūs kanalūs (2,79). Kūpejais videjais viertiejums ir 3 nu 5, i tikai pīcim nu 100 zeimynu tys ir 4 voi augšuoks.

Atškireibys ir ari nūzaru vydā. Ekspertu viertiejumā vysulobuokūs rezultatus sasnāguši mūdis i kosmetikys nūzaris zeimyni (videji 3,34 nu 5), kam sekoj puortykys ražuošona (3,04) i ādynuošona (3,03). Tok augšuoks ekspertu viertiejums vēļ nanūzeimoj atpazeistameibu: 64,2 % nu apvaicuotūs dzeivuotuoju naatpazyna nivīna nu aptaujā īkļautūs mūdis i kosmetikys zeimynu.

Pietejumā nūskaidruoti zeimyni, kuru komunikaceja sajāmuse augstuokū ekspertu nūviertiejumu. Atkluotajā Latgolys zeimynu komunikacejis reitingā 2026 gūdynuoti seši zeimyni: “Ausmeņa kebabs”, Latgolys viestnīceiba “Gors”, “Latvijas Maiznieks”, Lūznovys muiža, “One:Zero” i Rēzeknis Galis kombinats. Nu ražuošonys i gastronomejis da kulturai i turysmam – itī zeimyni aplīcynoj, ka kotrā nūzarē īspiejams atrast sovu unikalū bolsu i ar tū puorlīcynūšai uzrunuot auditoreju.

Cikom eksperti viertēja zeimynu komunikacejis kvalitati, poši Latgolys dzeivuotuoji atkluoja, kuri zeimyni jim īt pruotā pyrmī. Pietejumu agenturys “Berg Research” veiktajā aptaujā pīsadaleja 503 respondenti, kuri, lyugti nūsaukt Latgolys zeimynus bez atbiļžu variantu, vysubīžuok nūsauce Rēzeknis Galis kombinatu (29,8 %), “Goru” i “Preiļu sīru” (kotrys 12,3 %). Tok eipašu viereibu pīsaista vēļ kaids rezultats – 80,6 % apvaicuotūs skaita, ka Latgolā vēļ ir daudzi spieceigu uzjāmumu i organizaceju, par kurim cytvīt Latvejā zyna puoruok moz.

Taipoš aptaujis rezultati atkluoj, kai poši latgalīši viertej puormainis sovā regionā. Pādejūs pīcu godu laikā vysuvaira pozitivu puormaiņu dzeivuotuoji pamanejuši kulturys dzeivē i pasuokumu pīduovuojumā (37,4 %), infrastrukturys i apleicejuos vidis sakuortuošonā (35,5 %), taipoš ari turysma pīduovuojumā (33,8 %). Cikom jaunu uzjāmumu i dorba vītu jūmā uzlobuojumus pamanejuši tik 17,7 % apvaicuotūs.

“Latgola nav aizmiersts regions, dreižuok napamaneits. Mes raudzejom na tikai nūviertēt, kai Latgolys zeimyni komunicej itūšaļt, tok ari saprast, kur globojās tūs izaugsmis īspiejis. Cerejam, ka rezultati paleidzēs uzjāmumim pasavērt iz sovu komunikaceju nu molys i īraudzeit, kū, īspiejams, varātu dareit cytaiži. Pietejuma gaitā myusu leluokais puorsteigums beja cylvāku atsauceiba. Ari šudiņ Preiļu piļs zālē gondreiž nabeja breivu vītu. Tys ari beja myusu viersmierkis – aktualizēt, cik byutyska vīta sevkura uzjāmuma izaugsmē ir zeimyna vadeibai. Šudiņ dīnys pasuokuma pylnuo zāle līcynoj, ka uzjiemiejim itys temats ir aktuals,” doluos uzjāmuma “Sistering” leidzadybynuotuoja Katrīna Bartkeviča.

Plotuokā vārsumā ar pietejumu rezultatim var īpasazeit ITE.