Rokstu sagataveja: portals lakuga.lv

Svietejūt divdesmit pīcu godu jubileju, sovu pyrmū albumu “Dzīdit, meitys, skaistys dzīsmis” pavasarī izdavuse Rēzeknis nūvoda Ūzulainis pogosta folklorys kūpa “Zeiļa”. Kai viestej albuma informaceja, jimā ir īraksteitys 12 dzīsmis latgaliski, kurys ir tyvys pošom folklorys kūpys dzīduotuojom.

Rēzeknis nūvoda Ūzulainis pogosta folklorys kūpa “Zeiļa” dybynuota 2001. godā. Suokuos Irēnys Rampānis vadeibā kūpā saguoja puora sīvu, bet 2008. godā kūpys vadeibu puorjēme Ināra Blinova, reizē ari styprynojūt kūpys spāku i skaniejumu. Kai viestej folklorys kūpys informaceja, ir bejuši laiki, kod “Zeiļā” reizē dzīd četru paaudžu dzīduotuojis, bet itūšaļt juos ir treis paaudzis – babys, meitys i mozmeitys.

Albumā “Dzīdit, meitys, skaistys dzīsmis”, kas ir folklorys kūpys pyrmais albums, īraksteitys 12 latgaliskys dzīsmis – kūpys dalineicom sirdei tyvuokuos i iz vysa bīžuok dzīduotuos. Albumā īraksteitys “Malni muni kumeleni”, “Tymseņš guoja, tymseņš guoja”, “Dzīdit, meitys, vokorā”, “Muns mīlais dzeivoj tuoli”, “Treis gadeni audzynuoju“ i cytys tautysdzīsmis i ziņgis, kai ari Bronislavys Martuževys dzīsme “Zemli zvaigzneite puorguoja”. Kūpys albums īraksteits Eināra Lipska skaņu īrokstu studejā. Kai soka poša “Zeiļa”, tod albuma īroksts ir svareigs sūļs folklorys kūpys darbeibā, kam ļaus saglobuot i nūdūt tuoļuok “Zeilis” dzīšmu skaniejumu na tik koncertūs, bet vysur, kur kaids gribēs klauseitīs albumu, kai ari reizē cytom paaudzem īmyužynuots kūpys muzykalais montuojums.

Folklorys kūpys “Zeiļa“ albums “Dzīdit, meitys, skaistys dzīsmis“ izdūts CD formatā i cikom nav daīmams digitali, bet portala lakuga.lv skaiteituojim kūpa pīduovoj nūsaklauseit vīnu nu albuma dzīšmu – “Kuplys auga ūzuleņš“. “Ar itū dzīsmi mes suocem, tī i ūzuleņš, i zeilis, taida jautra,“ par dzīsmis izalaseišonu nūsoka kūpys vadeituoja Ināra Blinova.

Jaunais albums reizē ar divdesmit pīcu godu jubilejis svieteišonu tyka prezentāts 2026. gods 10. aprelī Rēzeknis nūvoda Ūzulainis tautys nomā. Sveicynuot “Zeiļu” jubilejā beja atbraukuse Maltys kulturys noma folklorys kūpa “Andeļneicys”, Veremu kulturys noma folklorys kūpa “Vuorpa”, Iļžukolna tautys noma folklorys kūpa, Ratnīku tautys noma folklorys kūpa “Rateņš”, Rogovkys etnografiskais ansamblis, Rykovys kulturys noma etnografiskais ansamblis, Rēzeknis folklorys kūpa “Rūta”, taipat Ūzulainis tautys noma senioru klubs “Uguntiņa” i senioru vokalais ansamblis “Nadzežda”.

Divdesmit pīcu godu darbeibys laikā folklorys kūpa “Zeiļa” bejuse kluotyn vysūs Ūzulainis pogosta svātkūs i cytuos nūtikšonuos pogostā i nūvodā, pīcys reizis pīsadalejuse Storptautyskajā folklorys festivalā “Baltica”, taipat dzīduots Latvejis Etnografiskajā breivdobys muzejā, Vyspuorejūs latvīšu dzīšmu i deju svātkūs i cytur.

Albuma izdūšonu atbaļstejuse Rēzeknis nūvoda Maltys apvīneibys puorvaļde i Vaļsts kulturkapitala fonds.