Rokstu sagataveja: portals lakuga.lv

4. julī “Latgolys šmakovys” dadzynuotova Ludzys nūvoda Malnovā svieteis desmit godu jubileju. Pasuokumā pīsadaleis baikeru klubs “Lotigola”, kuri skaiteis Imanta Zieduoņa (Ziedoņa) dzeju i vyzynuos apmaklātuojus, sovpus grupa “Kingi” uzastuos ar lelkoncertu. Kai stuosta dadzynuotuovys saiminīks Juoņs Krivtežs, tys, īspiejams, byus vīns nu pyrmūs pasuokumu Latgolā, kur vīnā īīšonys moksā “īkļauts vyss” – iedīni, dzierīni, koncerts, aktivitatis, ekskurseja i vītys apsavieršona.

“Latgolys šmakovys” dadzynuotovā jau desmit godu garumā ir vareiba apsavērt, kai teik radeits Latgolā tik tradicionalais styprais dzierīņs – šmakovka. Vystik ar laiku uzjāmuma darbeiba tyka paplašynuota, sataisūt jaunu produktu i pīduovojūt ari bezalkoholiskū dzierīni – šmohito. “Latgolys šmakova” ir vīns nu Latgolys regiona popularuokūs turysma objektu, kurs gona plotu atpazeistameibu izapeļnejs taišni ar tuo saiminīka Juoņa Krivteža aizrauteigū i humora pīpiļdeitū stuostejumu latgalīšu volūdā. Koč ari varātu padūmuot, ka Latgolys regionā vysys ekskursejis nūteik tikai latgaliski, tys patīseibā ir gona lels ratums, i turysma pīduvuojumā pamatā vystik dominej latvīšu literaruo volūda. Pyrmais lelais “Latgolys šmakovkys festivals” dadzynuotovā nūtyka 2019. godā, puļcejūt ap 600 gostu.

“Jau 2014. godā, kod topa “Latgolys šmakovka” beja gona daudz izteikumu, ka Latgolā nav kuo dareit i nu itīnis juobrauc paceli, ituos runys beja vīns nu munu dzynuļu suokt nazkū atteisteit i dareit, ruodeit, ka ite vyss nūteik. Pīruodeit, ka Latgolā var nūsadorbuot na tik ar kontrabandu, tok i legalu biznesu. Kaidi trauksmaini laiki beja pyrma desmit godu, taidi poši leidzeigi ir ari niu, tok mums ir juoturpynoj dzeivuot sovā zemē i atsateisteit,” doluos Juoņs Krivtežs, darunojūt, ka pasuokums lelā mārā veļteits cylvākim, kuri jū itymā desmit godu periodā ir stypri atbaļstejuši kai finansiali, tai ar padūmu i vīnkuorši lobim vuordim.

“Aicynoju nasabeit braukt iz regionu, te byus eistyn sirsneiga Latgolys balleite pavysam napīspīstā i vīglā atmosferā, kur varēs sasatikt i pasarunuot ar vysaiduokim foršim cylvākim,” tai Juoņs Krivtežs.

Jau itūšaļt dadzynuotovys teritorejā teik pastateita jauna skotive i lobīkuortuots pogolms. Pasuokumā pīsadaleis baikeru klubs “Lotigola”, kuri skaiteis Imanta Zieduoņa dzeju i vyzynuos apmaklātuojus, taipoš byus grupys “Kingi” lelkoncerts.

Beleti iz jubilejis pasuokumu daīmami ITE. Īīšonys moksā bez īrūbežuojumu byus īkļauti iedīni i dzierīni. vysi ījimtī leidzekli tiks izmontuoti “Latgolys šmakovkys” dadzynuotovys pogolma tuoluokai labīkuortuošonai. Dorbu vydā paradzātys vysaidys tehniskuos lītys, kas desmit godu periodā ir sovu nūkolpuojušys, tok paradzāta ari pandusa īreikuošona, kab ekskursejis dadzynuotovā byutu daīmamys ari cylvākim ar īrūbežuotom kusteibom.