Rokstu sagataveja: portals lakuga.lv

Vosora, eipaši juļs, ir eistais laiks, kod nakšņuot breivā dobā – teļtīs. Deļtuo itūreiz īsacejumus nedeļai sagataveja atpyutys vītys “Teltis Liepās” saiminīki Guntis i Agita Koniševski (Koņiševski). Jī īsoka atsapyust nu kasdīnys, apmeklēt “Muokslys pikniku” i atkluot jaunus pasauļa plotumus gruomotuos.

“Muokslys pikniks” Lūznovā

Jau vairuokus godus Lūznovys muižā nūteik “Muokslys pikniks” – tys ir breineigs kulturys pasuokums, kas nūteikti juoapmeklej! Itūgod “Muokslys pikniks” nūtiks 11. julī nu 15 leidz 22 stuņdem. Tī nūteikti byus kū dareit kai lelim, tai mozim! Vaira par pasuokumu ITE.

Atpyuta storp dabasim i zemi

Straujajā kasdīnā cylvāki bīži viņ napamona, cik dreiži puorsamej dīnys i īsastuoj kasdīnys rutina. Kab dzeivi padareitu kruosainuoku, laiku pa laikam vajag atsapyust pi dobys. Vīna nu vītu, kur atgiut spākus, prīcu i īdviesmi, ir atpyutys vīta “Teltis Liepās”, kur ir īspieja byut dobā i nakšņuot teļtīs, kurys atsarūn viers zemis – tuos īkuortys kūku stumbrūs. Vaira informacejis par atpyutys vītu ITE.

Ceļuojums gruomotā

Bet tī, kurim itūšaļt nav vareibys kur aizbraukt vai paceļuot kluotīnē, tū var izdareit, i siežūt sātā. Vīns nu veidu ir palaseit i paškūrsteit kaidu ceļuojumu aprokstu gruomotu. Myusu īsacejums – Žiga ci Žigimanta Krēsliņa gruomota “Karību salas”.