Rokstu sagataveja: portals lakuga.lv

Sastdiņ, 11. julī, Rēzeknis nūvoda Lūznovys muižys teritorejā nūtyka jau dasmytais muokslys i garšu festivals “Muokslys pikniks”. Pasuokumā varēja dzierdēt kai latgalīšu muzyku, tai i baudeit uorzemu muokslinīku skaņdorbus, redzēt cyrka izruodis, pīsadaleit rodūšajuos darbneicuos, apsavērt izstuodis, klauseitīs dzeju, paleidzēt izjimt malnuos keramikys cepli, gordai paēst voi vīnkuorši byut. Itei ir vīna nu spūdruokūs i apmaklātuokūs vosorys kulturys nūtikšonu Latgolā, kas kasgadeji puorsteidz ar daudzveideigu programu. Nūtikšona, kura aicynoj atbraukt. Ari portals lakuga.lv tī gasteja, kab izzynuotu, kas ir tys, kas cylvākus pīvalk.

Pasuokuma apmaklātuoja Inese, kas itūgod iz pasuokumu atbraukuse ar draugu nu Olyuksnys i dālu, stuosta: “Es beju iz pošu pyrmū “Muokslys pikniku”, kod vēļ beja moz cylvāku. Praktiski kotru godu ari asu braukuse iz teni, varbyut tik puora reizis asu izlaiduse. Ari dāls vysod ir braucs leidza, vēl mozeņš ite skraideja, niu jau lels izaudzs. Saceišu, ka pyrmais pikniks beja intimuokā atmosferā, koč kaidā ziņā tys ari beja lobuok, kod beja mozuok cylvāku, bet niu ite ir daudzi tautys, i niu jau cylvākim itys ir vosorys must have pasuokums, iz kurū dūtīs.”

“Muokslys pikniks” ir īcīneita nūtikšona na tik vītejim, bet ari gostim nu puornūvodim i uorzemnīkim. Itūreiz sateikam Šinji nu Kīnys, kura ari pasadola sovūs īspaidūs. “Latvejā dzeivoju jau puora godu. Cīši pateik ite, jiutūs labi. Maņ pateik īsasaisteit vītejuos aktivitatēs, niu jau ruodīs, ka Latgola i Daugovpiļs ari ir muna sāta. Maņ pateik cylvāki, kultura, doba, atmosfera. Asu jau pīroduse pi vairuoku lītu. Naasu vēļ eisti tik pīroduse pi iedīņa. Itymā pasuokumā asu pyrmū reizi, bet nūteikti na pādejū. Ite ir cīši šmukys dekoracejis, vyss ir labi organizāts, spieļoj loba muzyka, pateik rūkdorbu aktivitatis.”

Lūznovys muiža ir vīta, kur regulari teik eistynuoti vysaidi socialī projekti. Ari niu aizsuokts taids, kas nūteik sadarbeibā ar bīdreibu “Tavi draugi” i cytom vītejom organizacejom, kai ari ar Rēzeknis nūvoda atbolstu. “Myusu bāzis vīta ir Lūznovys muiža. Šudiņ kūpā ar Viļānu socialuo centra dzeivuotuojim vuorejom Āzejis sautiejumu, ar kurū baruojom muokslinīkus i par zīduojumim ari vysus pasuokuma apmaklātuojus. Ite salaseitī zīduojumi tiks nūvierzeiti Lūznovys muižys audio gida izveidei. Itys projekts nūtiks vasalu godu, tymā mes gataveisim puortykys kastis, kurys tod bez moksys pīguoduosim dzeivuotuojim, kurim byus taida vajadzeiba piec atbolsta, i pīsadaleisim vysaidūs kūpeigūs pasuokumūs,” par projektu stuosta Monta Vecuozola (Vecozola). Jei pyrma diveju godu apzynuoti puorsacēle dzeivuot iz Latgolu. Ari šyunu apraidis i dronu incidenti nav mainejuši juos dūmys par dzeivuošonu Latgolā. “Cīši pateik ite,” jei soka.

Vīna nu “Muokslys piknika” organizatoru, Lūznovys muižys kulturys projektu vadeituoja Inga Žirgule par gataveišonūs pasuokumam soka tai: “Reits beja slapnis i absoluti nacereigs, bet jau piecpušdīnē saprotom, ka vyss sasastuoj, kai vajag. Cylvāki plyust straumem, vīns pasuokums puorsamej ar nuokušū. Cylvāki mīrā bauda pasuokumu i atmosferu bez vysaidu oficialu uzrunu i pateiceibu. Asu cīši laimeiga.”

“Asu bejuse desmit piknikūs, bet naasu redziejuse nivīnu nu tūs. Dorba pi organiziešonys ir cīši daudzi. Itymā godā beja švuorbys, ka cylvāki varātu nūsabeit nu laikapstuokļu voi gaisa traukšmu, bet vyss ir atsataisnuojs. Ruodīs, ka cylvāki ilgojās piec itaida formata pasuokumu, kas ir gimeniski, dažaidi muokslys izpausmēs, garšuos. Muiža ir radejuse taidu atmosferu, kas cylvākus iz šeni aicynoj. Pyrma kaida laiceņa pasuokumā maņ kluot pīguoja paziņa, kurs 20 godu nabeja bejs Lūznovys muižā. Jis atbrauce nu Cāsu ar trejim bārnim. Smejūtīs jam praseju, voi aizbāguši nu sarunu festivala LAMPA, iz kū jis atsaceja, ka nui – aizbāguši. Atbraukuši ite, jo zynuojuši, ka itū pasuokumu var izbaudeit gimeniski i ar lobu atmosferu,” stuosta Inga.

Aktuals ir vaicuojums na tik par laikapstuoklim, kas var samaituot pasuokumu, tok ari par šyunu apraidem i gaisa telpys apdraudiejumu. “Gaisa trauksmis nūlykom tuoli plaukteņā, jo pyrma tuo izdarejom vysu napīcīšamū, kas beja juoizdora, ka nazkas taids nūtyktu, tok nu reita pasamūdem ar dūmu, ka šudiņ tys nanūtiks.”

Pasuokums eistyn izadeve – nabeja ni leita, ni šyunu apraidis. Cylvāku beja daudzi – vysi smaideigi i laimeigi. “Muokslys pikniks” eistyn ir nūtikšona, kur aizamierst vysys problemys i nagativais.

Fotogalerejā biļdis nu Lūznovys “Muokslys piknika”. Foto: Amanda Anusāne/portals lakuga.lv