Rokstu sagataveja: portals lakuga.lv

Piec decembrī izdūtuo i pi panuokumu tykušuo studejis albuma “Mygla” Latgolys folkmetala grupa “Varang Nord” eipaši izceļ vīnu nu albuma emocionali spieceiguokūs kompoziceju “Ašņa ausma”, pīduovojūt tuos videoklipu, kū taisejs pīredzejušais režisors Pāvels Trebuhins.

Grupa “Varang Nord” viestej, ka dzīsme “Ašņa ausma” dabuojuse lelu atsauceibu Eiropys koncertturis laikā, kai ari muzykys kuratoru i blogeru atzineibu vysā pasaulī, kas pamudynuojs pieškiert tai sovu vizualū stuostu. Dzīsmis videoklips veiduots Latvejis dobā – mežūs, pūrūs i kinys piļsieteņā “Cinevilla”, kur viesturyskuo vide sasavyn ar naskortu ainovu. Tai radeita dramatiska i emocionala atmosfera, kas sasasauc ar dzīsmis viestejumu.

Poši muziki par dzīsmi stuosta itai: “Pyrmī saulis spaiti apspeid zemi, kas kluota ar krytušajim karaveirim, salauztim zūbynim i vairūgim – klusom līceibom par nažieleigū ceiņu. Ašņa pīsasyukuse zeme īkruosoj reitadzīsnu sorkonā kruosā, sapludynojūt zemi i dabasus vīnā vasalā. Itei dzīsme nav stuosts par pošu kauju, tok par tuos sakom, atmiņom i dzeiveibys cenu.”

Videoklipa režisors ir Pāvels Trebuhins (TRE FILM), kurs jau daudzus godus sasadorboj ar taidim pīzeitim muzikim kā “Amon Amarth”, “Moonspell”, “Trivium”, “Smash Into Pieces” i daudzim cytim.

Videoklips dzīsmei “Ašņa Ausma” turpynoj “Varang Nord” rakstureigū pīeju – apvīnuot smoguo metala skaniejumu ar latgalīšu volūdu i viesturyskuo kulturys montuojuma īdvasmuotim motivim. Grupai tys ir veids, kai Latgolys identitate teik nasta aiz regiona rūbežu, īpazeistynojūt storptautyskū smoguos muzykys auditoreju ar latgaliskū kulturtelpu.

Grupa “Varang Nord” dybynuota 2014. godā, tuos spūdruokais sasnāgums ir uzvara pasaulī leluokuo metala festivala reikuotajā “Wacken Metal Battle” grupu konkursā. Grupa uzastuojuse taidūs festivalūs kā “Wacken Open Air”, “Kilkim Žaibu”, “Full Metal Holiday” i koncertējuse vaira nakai 15 Eiropys vaļstīs. Jaunuokais studejis albums “Mygla” sajiems Latvejis Metalmuzykys goda bolvu kai 2025. gods lobuokais īroksts, beja nomināts Latgalīšu kulturys goda bolvai “Boņuks 2025”, i itūgod grupa ari tyka nomināta GAMMA bolvai kategorejā “Goda metalmuzykys muokslinīks”.