Rokstu sagataveja: portals lakuga.lv

Muzykalais projekts “Viņš un Viņa” klauseituojim pīduovoj dzīsmi “Reitā agri saule lēce”, kas radeita sadarbeibā ar elektroniskuos muzykys muokslinīku Rick Feds. Tys ir pyrmais singlys nu albuma “Electronic Folklore” – konceptuala īroksta, kurā latvīšu tautysdzīsme sasateik ar džeza breiveibu i elektroniskuos muzykys skaniejumu. Tymā īkļautys ari vēļ divejis dzīsmis latgaliski: “Guoju pa mežu” i “Treis muosenis ūguos guoja”.  

Projekta “Viņš un Viņa” dalineica Ilze Lejiņa stuosta, ka folklora ir daļa nu juos pīredzis i identitatis, tymā skaitā ari dzīduošona latgaliski: “Asu dzymuse i auguse Modūnē, nu sešu godu vacuma dorbuojūs folklorys kūpā “Madonas vērtumnieki”. Tī īsavuiceju vītejū – Modūnys sieļu izlūksni i dzīsmis, kas pīraksteitys tī. Piečuok studieju Rēzeknis muzykys koledžā. Tī maņ draudzinis īvuiceja vairuokys dzīsmis latgaliski, kurys dzīduojom vakariešonuos. Īpasazynu ar vītejim muzikim Igaunim, sajutu latgalīšu dzīšmu garšu, ļusteigumu, prīcu. Tod muni celi nūvede iz Fraņceju, tī kūpā ar Luksemburgys folklorys kūpu “Dzērves” bīži dzīduojom ari dzīsmis nu Latgolys.”

Ilze turpynoj: “Dzīsme “Reitā agri saule lēce” maņ nav atrosta arhivā voi izalaseita eipaši albumam. Tei vīnkuorši vysod ir bejuse ar mani – munā dzīšmu kladē nu bierneibys. Asu tū nasuse sev leidza cauri vysaidim dzeivis pūsmim, vaļstim i muzykalom pīredzem. Niu tei atsagrīž cytā skaniejumā, bet ar tū pošu sajiutu.”

Jaunajā īrokstā tautysdzīsmis melodeja teik pi myusdīneiga i daudzsluoņaina skaniejuma. Ilze Lejiņa dzīsmē dzierdama vokalā, Fred Hormain taisejs aranžiejumu i īskaņuojs saksofonu, sovutīs Rick Feds īrokstam pīškir elektroniskuos muzykys dimenseju.

“Reitā agri saule lēce” īzeimoj projekta jaunuo albuma “Electronic Folklore”, kas oficiali tiks prezentāts 21. julī, muzykalū vierzīni. Tys dūmuots kai konceptuals albums, kurā tautyskais džezs sasavīnoj ar elektroniskū skaniejumu, meklejūt dzeivu i šudineigu volūdu latvīšu folklorys materialam. 

Projekts “Viņš un Viņa” jau vaira nakai četrpadsmit godu veidoj sovu muzykalū rūkrokstu, savīnojūt dažaidys kulturys, žanrus i skotivis pīredzis. Jaunais albums “Electronic Folklore” ir nuokušais sūļs itymā rodūšajā ceļā – atsagrīzšona pi latvīšu tautysdzīsmis, verūtīs iz tū caur džeza, improvizacejis i elektroniskuos muzykys prizmu.

Jaunū albumu “Viņš un Viņa” prezentēs sovā nu jau par tradiceju palykušajā vosorys koncertturē. Ilze Lejiņa soka, ka jūs ilgtermiņa mierkis ir byut koncertiejušim vysā Latvejā, ar tū dūmojūt kotru mīstu.