Rokstu sagataveja: portals lakuga.lv

Ituo gods maja suokuos TV3 šova “Koru kari” pīktajā sezonā uzvarēja Daiņa Skuteļa vadeitais Preiļu purpura kors. Pa itū laiku koram bejuši vairuoki koncerti vysaiduos Latvejis vītuos, tok niu, rudinī, tam paradzāti vēļ treis koncerti Rēzeknē, Ūgrē i Valmīrā.

Piec spūdruos uzvarys TV3 muzykalajā šovā “Koru kari” Daiņs Skuteļs i Preiļu purpura kors niu pīduovuos skateituojim eipašu koncertprogramu, kas izskanēs vairuokuos Latvejis piļsātuos. Tei byus vareiba kluotīnē satikt ituos “Koru karu” sezonys uzvarātuojus i vēļreiz pīdzeivuot emocejis, kas aizkustynuoja tyukstūšom skateituoju vysā Latvejā. Koncertus vadeis akters Dainis Grūbe, kurs, cyta storpā, vadeja ari pošu TV šovu. Cikom par muzykalū pavadejumu ryupēsīs pavodūšuo grupa Jura Kristona vadeibā. Organizatori sūlej, ka itī koncerti byus kas vaira par vīnkuoršu atsavieršonu iz televizejis šovu – tī byušūt eistyni muzykali svātki.

“Mes jau nu suoku nūsprīdem, ka koncertu nabyus daudzi i ka mes tūs taiseisim poši, kab eistyn saglobuotu tū kvalitatis leimini, kaidu uzturiejom ari vysa šova laikā. Cylvāki ir vārušīs šovu, redziejuši myusu uzastuošonys, i tei ir myusu atbiļdeiba snēgt taidus prīšknasumus, kab skateituojim nabyutu sajiutys, ka nazkuo nav. Uzastuot taipat kai šovā – ar kusteibom i vysim horeografiskim rysynuojumim nav tik vīnkuorši, ir sarežgeiti specifiski nūdrūsynuot vysu apskaņuošonu, apgaismuošonu i podestus, taipoš ari, kab mes varātu nūmaineit tārpus, ir vajadzeigs laiks i vīnkuoršā koncertprogramā, pīmāram, kaidūs piļsātys svātkūs, mes tū navarim izdareit. Taišni deļtuo mes reikojam sovus koncertus, kur golvonais byus Rēzeknē, Latgolys viestnīceibā “Gors”. Myus papyldynuos draugi – Agra Danileviča deju školys “Dzirnas” zalta sastuovs. Cīši prīcuosimēs satikt sovus klauseituojus i atbaļsteituojus koncertūs, kuri byus piec vareibys pītyvynuoti tai pīredzei, kaidu skateituoji vareja vāruot TV šova laikā,” doluos vīna na kora dalineicu Antra Skutele, kura par šova pīredzi ir stuostejuse ari intervejā.

Preiļu purpura kora koncerti gaidomi 5. septembrī Latgolys viestnīceibā “Gors” Rēzeknē, 13. septembrī Ūgris nūvoda Kulturys centrā i 18. oktobrī Valmīrys Kulturys centrā. Beleti daīmami ITE.