Rokstu sagataveja: portals lakuga.lv

20. septembrī Reigys cyrka Zyrgu stalī pyrmizruodi pīdzeivuos teatra trupys “Kvadrifrons” jaunuokais īstudiejums “Apjukušais bārns” – dokumentala izruode latgalīšu volūdā par identitati, kas na vysod pasakļaun vīnkuoršom definicejom, viestej trupys puorstuovi.

Akters Juoņs Krūņs (Jānis Kronis) ir audzs Gaigalovā, tok leluokū daļu myuža jis nūdzeivuojs Reigā. Šaļtī, kod vacuokuo meita jam pavaicoj, kas tod eisti ir latgalīts, it kai vīnkuoršais vaicuojums roda nagaideitu apjukumu. Izaruoda, ka cylvākam, kurs vysu myužu sevi skaitejs par latgalīti, nimoz nav tik vīgli paskaidruot, kū tys nūzeimoj.

“Maņ vysod ir ruodejīs pošsaprūtamai, ka asu latgalīts. Asu audzs Latgolā, muna pyrmuo volūda ir latgalīšu, runoju tamā ar sovim bārnim. Tok tod izaruoda, ka šaļtī, kod tev juopasoka, kū eisti nūzeimoj byut latgalīšam, vyss palīk daudzi sarežgeituok. Suoc dūmuot par vītu, kur esi dzims, par volūdu, saimi i tū, kur dzeivoj niu, i pieški vaira nav skaidrys, kurā nu itūs lītu eisti atsarūn tova identitate. Saprotu, ka maņ pošam iz itū vaicuojumu nav eisti lobys atsaceišonys,” stuosta izruodis golvonais varūņs i izpiļdeituojs Juoņs Krūņs.

Kab atsaceišonu vystik raudzeitu atrast, Juoņs kūpā ar izruodis rodūšo komandu dasagivs pietnīceibai. Tuos centrā ir diveju nedeļu ekspediceja pa Latgolu, kurā jis sateik vysaidus cylvākus, aizdūd vaicuojumus, pīroksta, dokumentej i rauga saprast, kas nu dzierdātuo atsatīc i iz jū pošu.

Pietejuma centrā ir mieginuojums saprast, kas myusu dīnuos veidoj latgaliskū identitati. Ekspedicejis laikā viereiba pīgrīzta volūdai, dzeivis vītai, saimei, tradicejom i cylvāka poša izalaseišonai sevi saukt par latgalīti. Eipaši byutyska izruodis veiduotuojim ir latgaliskuos identitatis saglobuošona uorpus Latgolys i tys, kai itei identitate puorsamej, puorīmūt nu vīnys paaudzis nuokušajā.

“Mes suocem ar it kai vysā vīnkuoršu pietnīcyskū vaicuojumu – kas ir latgalīts – i braucem pa Latgolu meklēt iz tuo atsaceišonys. Runuojom ar cīši dažaidim cylvākim, i vysā dreiži palyka skaidrys, ka vīnys atsaceišonys, vysutycamuok, nabyus. Kotram satyktajam cylvākam latgaliskums nūzeimoj koč kū drupeit cytu, i bīži viņ ituos izpratnis teik pretrunā cyta ar cytu. Kū ilguok braucem i kū vaira cylvāku satykom, tū gryušuok palyka kū nabejs skaidri definēt. Maņ redzīs, ka taišni itys apjukums beiguos ari tyka par svareigu izruodis daļu – mes laidemēs ceļā, kab nazkū nūskaidruotu, tok atsagrīzem ar vēļ vaira vaicuojumim i daudzi sarežgeituoku prīškstotu par tū, kū vyspuor nūzeimoj pīderēt kaidai vītai i kulturai,” stuosta izruodis dramaturgs Juoņs Golubovs.

Izruode veiduota kai ekspedicejis materialu prezentaceja – ar pīzeimem, dokumentātim satyktūs cylvāku stuostim i Juoņa poša pīredzi. Lauka pietejums tamā sasateik ar cīši personeigu stuostu par volūdu, saimi, puorsaceļšonu paceli nu dzymtuos vītys i mieginuojumu saprast, kū nu sovys identitatis īspiejams saglobuot i nūdūt tuoļuok.

“Apjukušais bārns” ir izruode latgalīšu volūdā par identitati, kas napasakļaun pietnīceibai, i par cylvāka mieginuojumim atrast sovu vītu pasaulī.

Izruodis rodūšajā komandā struodoj Juoņs Krūņs, Juoņs Golubovs, Klāvs Mellis, Elīna Pērkone, Valters Karlsons i Aleksandrs Lisovs. Izruodis producente – Ance Strazda, tehniskais producents – Reinis Boters. Ar latgalīšu volūdu tolkā guojuse Edeite Laime. Izruodi atbaļstejs Vaļsts kulturkapitala fonds, Reigys cyrks, “Irve” i “Mellis grupa”. Izruodis veiduotuoji eipašu paļdis soka Agrim Bitānam, DJ Guntix (Gunāram Indričānam) i Eduardam Haļasam. Beleti iz izruodi nūpierkami ITE.