Rokstu sagataveja: portals lakuga.lv

Itūvosor latgalīšu muziks Sovvaļnīks izdeve sovu jaunū albumu “Cārtumi”. Niu, gaidūt Sovvaļnīka solokoncertu, kas paradzāts 25. septembrī Latgolys viestnīceibā “Gors”, vīnai nu albuma dzīšmu – “Ar Reigys morali” –, kurys teksta autors ir rogovkīts, dzejnīks i publicists Pīters Jurciņš, radeits videoklips, kas gūdynoj ari Nautrānu kulturtelpys cylvākus i vītys, informej bīdreibys “Nautrānu kulturtelpai” puorstuove Inga Vigule.

Dzīsme “Ar Reigys morali”, kurys muzykys autors ir Sovvaļnīks i kurai radeits jaunais videoklips, pyrmū reizi izskanēja 2021. godā pasuokumā “Pīterdīna Rogovkā”. Pītera Jurciņa dzejūlī i originalajā dzīsmis tekstā skaņ ryndys “ar Reigys morali iz Rogovku tu nabrauc, muos”. Jaunajā dzīsmis versejā, saskaņojūt ar Jurciņa autortīseibu mantinīkim, vuords “Rogovka” aizstuots ar “Latgola”.

Kai skaidroj Sovvaļnīks, ituos puormejis izdareitys apzynuotai, kab dzīsmis viestejumu aktualizātu plotuokā kontekstā i dagrīztu viereibu problemom, kas nav rakstureigys tik Rogovkai, tok Latgolai kūpumā. “Latgolā ir cīši daudz darbeigu, uzjiemeigu i rodūšu cylvāku, kas dorbojās turysma, kulturys, lauksaimisteibys, amatnīceibys i cytuos nūzarēs. Pādejā laikā taišni jūs vysuvaira ītekmej asūšuo drūseibys i ekonomiskuo situaceja. Latgalīši ir ar cīši stypru goru, speitu i vierteibom,” soka Sovvaļnīks ci eistajā vuordā Ingars Gusāns.

Dzīsmis videoklips fiļmāts pārņ Latvejis Nacionalajā namaterialuos kulturys montuojuma sarokstā īkļautajā Nautrānu kulturtelpā, izceļūt vītejūs ļauds, kulturviesturyskūs objektus, saimisteibys i ainovys. “Tys ruodejuos lykumsakareigai, kam ari dzīsmis vuordu autors Pīters Jurciņš ir rogovkīts, kurs beja lapnys par sovom saknem. Pādejuo goda laikā Latgolys kulturā īsazeimēja divejis spūdrys nūtikšonys – pārnajā rudinī Nautrānu kulturtelpa kai vierteiba tyka īkļauta Nacionalajā namaterialuo kulturys montuojuma sarokstā, palīkūt tikai par ūtrū kulturtelpu Latgolā ar itaidu statusu, i itūvosor Sovvaļnīks izdeve muzykys albumu “Cārtumi”, kur vairuokom dzīsmem tekstu autori ir taišni Nautrānu kulturtelpys dzejnīki,” smaidūt nūruoda Sovvaļnīks.

Ari pats muziks jau vairuokus godus dzeivoj Rogovkā i aktivai īsasaista vītejuos kulturys dzeivis nūtikšonuos. Videoklips radeits, svietejūt grupys “Sovvaļnīks” 18 darbeibys godu jubileju, reizē gūdynojūt Nautrānu kulturtelpys nūzeimeigū davumu latgalīšu kulturys saglobuošonā i atteisteibā. Ar dzīsmi “Ar Reigys morali” Sovvaļnīks turpynoj aktualizēt latgalīšu kulturu, vītejūs kūpīnu nūzeimi i vaicuojumus, kas byutiski na tik vīnai apdzeivuotai vītai, bet Latgolys regionam kūpumā.

Videoklipa fiļmiešona nūtyka vysaiduos Nautrānu kulturtelpys vītuos – z/s “Liepkalni”, Maijis Gailumys “Podniekos”, “Dainas dārznieku skolā”, “Mežvidu tomātos”, z/s “Sils”, “Lavandrūtas”, z/s “Mežeņi” i saimisteibā “Vāliņi”. Klipā pīsadaleja Nautrānu pogosta Nautrānu kulturys centra amaterteatra “Dekteri” dalinīki, kai ari duorzu ainovu plānuošonys pasnīdzieja, rogovkīte Marta Zvejsalniece.

Videoklipa scenareju veiduoja i tū režisēja amaterteatra “Dekteri” režisore Ērika Bozoviča, sovutīs par fiļmiešonu i montažu ryupējuos Ivars Utināns. Videoklipa tapšonu finansiali atbaļsteja Rēzeknis nūvoda pošvaļdeiba Rodūšūs dorbu projektu konkursā, bet projektu eistynuoja bīdreiba “Nautrānu kulturtelpai”.

Ituo gods 25. septembrī Rēzeknē, Latgolys viestnīceibā “Gors”, nūtiks Sovvaļnīka solo koncerts divejuos daļuos “Sovvaļnīkam 18”. Tymā skanēs dzīsmis nu muzika īprīškejūs albumu, kai ari nu jaunuo albuma “Cārtumi”. Koncerta beletus var nūpierkt “Biļešu Paradīzes” tierdznīceibys vītuos i škārsteiklā.