Rokstu sagataveja: portals lakuga.lv

Dasmytū reizi Storptautyskuo Rakstnīku i tulkuotuoju sāta i Ventspiļs vaļstspiļsātys pošvaļdeiba pasnēgs bolvu “Sudraba tintnīca” par itamā rezidenču vītā radeitu dorbu dzejā, prozā i tulkuošonā iz i nu latvīšu volūdys. Itūgod bolvu par lobuokū dzejis dorbu sajims Ligija Purinaša i juos kruojums “Magnificat”.

Sūpluok Ligijai Purinašai dzejā, bolvu prozā sajims Inga Žolude par gruomotu “Tēvs”; tulkuošonā nu latvīšu volūdys – tulkuotuoja Lile Raifa (Lil Reif) par Rasys Bugavičutis-Pēcis dorba “Puika, kurš redzēja tumsā”, Viļa Kasima “Lizergīnblūza” i Svena Kuzmina dorba “Brīvībene” tulkuojumu vuocu volūdā, bet tulkuošonā iz latvīšu volūdu – tulkuotuoja Daila Uozuola (Ozola) par igauņu myusu dīnu lugu izlasis tulkuojumu.

Apbolvuošonys ceremoneja byus 17. oktobrī 17 stuņdēs koncertzālē “Latvija” koncerta “Literatūras un mūzikas satikšanās” laikā. Koncertā īsaskanēs Friča Bārdys dzeja i Karmenys stuosts muzykalā interpretacejā, kū atskaņuos jauktais kors “Ventspils” i Ventspiļs kamerorkestris dirigenta Aigara Meri vadeibā.

Ligija Purinaša par jai pīškiertū bolvu soka: “Maņ itei bolva vīnnūzeimeigi ir lels puorsteigums, lels pagūdynuojums i vys jau sovā ziņā ari atbiļdeiba turpynuot magnificēt cytūs muokslys formatūs i literaturys žanrūs. Paļdis komandai, kas stuovēja i beja sūpluok itai gruomotai: Elīna [Kokareviča] paleidzēja atlaseit lobuokūs tekstus i tūs spūdrynuot, Laura [Melne] čubinēja latgaliskūs tekstus, kurūs īmete aci ari Ilze [Sperga], Raivis [Nikolajevs] sazeimuoja ilustracejis, bet Volūdu sāta mums deve drūsu telpu tū vysu dareit. Dūmoju, ka itei bolva ir nūzeimeiga ari latgalīšu literaturai – itymūs tekstūs raudzeju aplīcynuot sovpateigumu, vajadzeibu piec naārtom taisneibom, izkuopšonu nu komforta zonys, atsasokūt nu pošcenzurys i izpatikšonys nazkaidam nūteiktu temu ītvoram.”

Iz vaicuojumu, cik lela nūzeime “Magnificat” tapšonā bejuse taišni Ventspiļs Rakstnīku i tulkuotuoju sātai, Ligijai atsoka: “Pi “Magnificat” struoduoju ilgi, ari paraleli cytim dorbim, pīmāram, romana raksteišonai. Magnifikaceju teksti atguoja, bet na vysod gruomotys topšonys laikā tī palyka namaineigi – jī kai dzeivs organisms auga, šaļtim ari sevi puorauga i puorsaveiduoja, pasadzilinuoja. Maņ tam vajadzēja telpu i laiku. Rakstnīku sāta deve impulsus dažom magnifikacejom, bet ari ļuove kritiski pasavērt iz tū, kas jau ir saraksteits i veikt atbiļsteigus lobuojumus. Pa munam, poškritika ir fundamentala līta.”

Bolva “Sudraba tintnīca” teik pīškierta kotru ūtrū godu. Bolva ir 900 eiro apmārā. Bolvys veidūlu ir izdūmuojs i izgatavejs muokslinīks Jānis Kupčs, jamūt par pamatu Rakstnīku sātys 18.g. s. kamina pūdeņu gleznuojumus.

Itūgod bolvys žurejis komisejā struoduoja: Ventspiļs vaļstspiļsātys pošvaļdeibys izpylddirektora vītneica izgleiteibys i kulturys vaicuojumūs Ineta Tamane, Puorventys bibliotekys vadeituoja Solvita Štekerhofa, dzejneica Ieva Rupenheite, Ventspiļs bibliotekys direktore Astra Pumpura, dzejneica Inga Pizāne, dzejnīks, tulkuotuojs Edvīns Raups, tulkuotuoja Dace Meiere, tulkuotuojs Dens Dimiņš.

Ligijis Purinašys kruojumu “Magnificat” veidoj pīcys dalis, kuruos apsavārtys sīvītis attīceibys ar buozšonuos viersā pīredzi, ar dzymtū vītu, ar dzymdynuotuojim i cylvākim sūpluok, ar romantiskū partneri i gols golā ar sevi eistyn eksistencialā leiminī, apsazynojūt i pījamūt tū, ka “es” var tyvuotīs “cytam/cytim” tik da nūteikta rūbeža, kurū škārsojūt “es” vystik palīk vīns. Idejiskū kruojuma dziļumu i dzejis volūdys īdarbeibu pastyprynoj dzejprozys forma, kū īdvasmuojuse lyugšonu stilistika, kai ari smolkais, unikalais poetismys, kaids rakstureigs Ligijai Purinašai. Nūsaukums “Magnificat” īt nu latiņu volūdā puorcalta slavynuojuma Jaunovai Marijai, atsasaucūt iz tekstūs izmontuotū lyugšonu stilistiku, kas saplyudynuota ar aktualom temom i kū spūdrai atainoj kruojumā īkļautuos muokslinīka Raivja Nikolajeva originalilustracejis. Kruojumu veidoj dzejproza latvīšu literarajā i latgalīšu rokstu volūdā.