Rokstu sagataveja: portals lakuga.lv

22. septembrī Latvejis Nacionaluo kulturys centra (LNKC) Namaterialuo kulturys montuojuma padūme izviertēja dasacejumus Nacionaluo Namaterialuo kulturys montuojuma saroksta papyldynuošonai. Itūreiz tymā īkļauta vīna jauna vierteiba – “Apdzīduošona Dīnavydlatgolā”, informej LNKC puorstuovi.

LNKC itūgod jau dasmytū reizi izsludynuoja dasacejumu pījimšonu Nacionalajam Namaterialuo kulturys montuojuma (NKM) sarokstam. Sevkurs tyka aicynuots dasaceit elementus, kas skaitomi par vaļsts aizsorgojamom NKM vierteibom i kuru īkļaušonai sarokstā ir lels attīceiguos kūpīnys atbolsts i leidzdaleiba. 17. juņa sēdē NKM padūme nu īsyuteitūs treis dasacejumu atlaseja divejus, dūmūt vareibu tūs īsniedziejim ar ekspertu paleidzeibu sovus dasacejumus papyldynuot i precizēt. 22. septembrī NKM padūme nūsprīde sarokstā īkļaut vīnu vierteibu: “Apdzīduošona Dīnavydlatgolā” (dasaceituojs: bīdreiba “Iniciatīvu un kompetenču atbalsta centrs”).

“Itūgod Namaterialuo kulturys montuojuma sarokstu papyldynuojuse tikai vīna vierteiba, tok prīcojūs, ka tei ir saisteita taišni ar dzīduošonu, kam tikū ir apstyprynuots jauns Eiropys kulturys ceļš “Dzīduošonys montuojuma ceļš”, kurā īsaisteita i Latveja. Jaunuo Nacionaluo saroksta vierteiba eistyn atbylst ituo ceļa saturam i mierkam – saglobuot i popularizēt dzeivuos tradicejis”, pastreipoj LNKC Namaterialuo kulturys montuojuma eksperte Gita Lancere.

Aplīcynuojums par jaunuos vierteibys īkļaušonu Nacionalajā namaterialuo kulturys montuojuma sarokstā tiks padūts Daugovpiļs folklorys festivala laikā 18. oktobrī Daugovpilī, Vīneibys nomā.

Itūšaļt kūpā ar jaunū vierteibu sarokstu veidoj 47 vierteibys. Ar tom var īpasazeit ITE. Jaunu dasacejumu pījimšonu LNKC izsludynoj kotru godu janvara suokuos. Lāmumu par īkļaušonu pījam NKM padūme, kurys sastuovā ir kai pietnīki, tai augstškolu i nūvodu navaļstiskūs organizaceju puorstuovi, Kulturys ministrejis, Izgleiteibys i zynuotnis ministrejis, Vidis aizsardzeibys i regionaluos atteisteibys ministrejis, kai ari UNESCO Latvejis Nacionaluos komisejis delegāti puorstuovi.