Rokstu sagataveja: portals lakuga.lv

Jau pavysam dreiži, 29. oktobrī, Kruoslovys piļs kompleksa restoranā i kulturtelpā “Fon Bubert” gaidoms ituo gods ūtrais i nūslādzūšais seminaru cykla “Spāka LAB” pasuokums. Tuo mierkis ir ceļt Latgolys regiona kulturys dzeivis kustynuotuoju i navaļdeibys organizaceju kapacitati. Kruoslovys seminarā dagrīzsim viereibu prasmem pastuosteit par sovu nūtikšonu, kab par tū zynuotu ļauds nu Latgolys da Kūrzemei. Seminaru organizej bīdreiba “Nezināmā Rēzekne” cīšā sadarbeibā ar latgalīšu kulturys kusteibu “Volūda”, ar Kulturys ministrejis i Latvejis Nacionaluo kulturys centra atbolstu.

29. oktobrī nu 10 da 16 stuņžu Kruoslovys piļs kompleksa restoranā i kulturtelpā “Fon Bubert” nūtiks “Spāka LAB” seminars “Byut radzamim: kai pastuosteit par sovu nūtikšonu, kab par tū zynuotu nu Latgolys da Kūrzemei”. Seminara mierkis ir aktualizēt vajadzeibu komunicēt myusdīneigai i radzamai, kab ari regionalys kulturys nūtikšonys i pasuokumi byutu atpazeistami i zynomi uorpus vīnys piļsātys ci nūvoda tvāruma. Taipoš tiks runuots par kūpīnys styprynuošonu, vysaiduoku aktivitašu veiduošonu, rodūšai izmontojūt iz vītys daīmamūs resursus.

Pasuokuma apmekliešona ir bez moksys, interesentim byus vareiba tikt pi Latvejis Nacionaluo kulturys centra sagataveita aplīcynuojuma par daleibu seminarā. Registraceja daīmama ite: ej.uz/spakalab2026-02.

Seminarā ar sovu pīredzi daleisīs Mārcis Rubenis, kurs ir vīns nu kusteibys “Free Riga” dybynuotuoju i piļsātvidis aktivistu. Jis ir paleidziejs atdzeivynuot tukšys i naizmontuotys Reigys ākys, puorvieršūt tuos par vītom kulturai, rodūšom iniciativom i kūpīnom. Sovpus ceļuojumu i pasuokumu organizatore Sindija Vilde stuosteis par sova uzjāmuma “Spalva Latvia” plotū pīredzi autentisku i cīši personeigu pīdzeivuojumu izveidē. Jei pastreipoj, ka Latgolys regions nav “pa ceļam”, vys Latgola dreižuok ir īmeslis ceļam.

Sovpus Patentu vaļdis preču zeimu i dizainparaugu departamenta direktore Ieva Paula Drekslere īdūs padzilinuotuoku prīškstotu par amatnīceibys i ryupnīceibys ražuojumu geografiskuos izceļsmis nūruožu aizsardzeibys prīšknūsacejumim, registracejis procesu i īsacejumim dasacejumu sagataveišonys procesā. Cytim vuordim sokūt – deļkuo byutu svareigai patentēt sovus ražuotūs produktus i kai tū izdareit.

Ūtrais “Spāka LAB” seminars byus saistūšs kai kulturys dzeivis organizatorim, tai turysma nūzaris puorstuovim, kab drupeit nu cyta aspekta pasavārtu iz veidim, kai mes organizejam i stuostom par sovom nūtikšonom.

29. oktobra dīnys parāds:

10.00–10.30 – Īpasazeišona
10.30–11.00 – Kopejneicys “Fon Bubert” saiminīku pīredzis stuosts
11.00–12.30 – Bīdreibys “Free Riga” leidzdybynuotuojs Mārcis Rubenis
12.30–13.30 – Pauze i vareiba pasastaiguot pa Kruoslovys piļs kompleksu breivdobā
13.30–14.30 – Ceļuojumu i pasuokumu organizatore Sindija Vilde ci “Spalva Latvia”
14.30–15.30 – Patentu vaļdis Preču zeimu i dizainparaugu departamenta direktore Ieva Paula Drekslere.

Par “Spāka LAB”

Pyrmī “Spāka LAB” rodūšī seminari, kas veļteiti Latgolys kulturys dzeivis organizātuoju i navaļdeibys organizaceju puorstuovu kapacitatis styprynuošonai i ideju apmaiņai, nūtyka 2023. goda suokumā. Da šam seminari, kurūs runuots par komunikacejis prašmu styprynuošonu, vītu stuostu veiduošonu, jaunīšu īsaisti tradicionalajā kulturā i jaunu pasuokumu ideju radeišonu, nūtykuši Kuorsovā, Daugovpilī, Preiļūs, Leivuonā, Bolvūs, Rēzeknē i Rēzeknis nūvodā. Rodūšūs seminaru cyklys teik organizāts, pasasokūt Kulturys ministrejis i Latvejis Nacionaluo kulturys centra atbolstam. Ituo gods seminara organizatori ir bīdreiba “Nezināmā Rēzekne” cīšā sadarbeibā ar latgalīšu kulturys kusteibu “Volūda”. Seminaru cykla nūsaukumā ar latgaliskū vuordu “spāks” (latv. lit. – spēks) īkodāta kapacitatis ceļšona, sovpus “lab” ir saeisynuojums nu vuorda “laboratoreja” – vīta, kur ar idejom, eksperimentim i procesim rūnās nazkas jauns, itymā gadīnī – kulturys nūtikšonys i nūzaris atteisteiba Latgolys regionā.