Rokstu sagataveja: portals lakuga.lv

Trešdiņ, 7. oktobrī, tyka sasaukta SIA “Austrumlatvijas koncertzāle” uorkuortys dalinīku sapuļce steidzameibys kuortā, kuru inicēja Rēzeknis vaļstspiļsātys pošvaļdeiba, ar mierki īceļt jaunu Latgolys viestnīceibys “Gors” vaļdis lūcekli. Sapuļcē pījimts lāmums, ka tei byus Antra Skutele. Vystik, īspiejams, jau oktobra vydā Saeima varātu pījimt “Gora” lykumprojektu. Kulturys ministrejis puorstuovs soka, ka pošvaļdeiba itymā gadīnī nav īvāruojuse lobys puorvaļdeibys principu.

Saeimys Izgleiteibys, kulturys i zynuotnis komiseja ūtardiņ, 6. oktobrī, naveice byutyskus grūzejumus lykumprojektā par Latgolys viestnīceibu “Gors” i vierzeja tū izskateišonai Saeimā trešajā lasejumā. Lykumprojekts paradz aizsorguot koncertzālis nakustamū eipašumu i nūsaceit Kulturys ministrejis īsaisti tuos puorvaļdeibā, tok naparadz garantātu vaļsts finansiejumu koncertzālis darbeibys nūdrūsynuošonai. Vystik ite “Gora” Muokslinīcyskuos dalis vadeituoja, kura itūšaļt pylda ari vaļdis lūceklis pīnuokumus, Ilona Rupaine jau īprīšk ir izasacejuse, ka lykumprojektā nav styngra nūsacejuma, ka nu vaļsts nabyus nikaida atbolsta “Gora” darbeibys nūdrūsynuošonai. Vys ir atrunuots, ka Kulturys ministreja var delegēt konkretus aizdavumus kulturys i kulturizgleiteibys jūmā, taipoš tys atsatīc iz latgalīšu volūdu i latgaliskuos identitatis saglobuošonu, aizsardzeibu i atteisteibu. Ilona Rupaine izsoka styngru nūceju, ka vaļsts varātu “Goram” delegēt kaidus aizdavumus i attīceigu finansialu atbolstu.

Uzrunuota piec 7. oktobra uorkuortys sēdis, “Gora” muokslinīcyskuos dalis vadeituoja Ilona Rupaine soka, ka eistyn navar snēgt papyldu komentarus, partū ka koncertzālis komanda dīvamžāļ nav tykuse īsaisteita vaļdis lūcekļa atlasis procesā. Ari par niu īcaltū vaļdis lūcekli Ilona Rupaine atsasoka izsaceit konkretus komentarus, kam da šam juos nav bejušys sovā vydā pazeistamys i ari vēļ nav izadevs pasarunuot.

Antra Skutele ir dzymuse Preiļūs, absolviejuse Reigys Muzykys vydsškolys kora klasi, dabuojuse bakalaura grādu kulturys uzjiemiejdarbeibā, kulturys vadeituoja kvalifikaceju, kai ari socialūs zynuotņu profesionalū magistra grādu kulturys vadeibā Ekonomikys i kulturys augstškolā. Īprīšk Antra struoduojuse par direktori Jākubpiļs kulturys puorvaļdē i Leivuona nūvoda kulturys centrā, taipoš ari struoduojuse pošvaļdeibys agenturā “Ūgris nūvoda Kulturys centrys” par nūvoda kulturys koordinatoru – projektu vadeituoju. Sovpus pādejā laikā plotuoka publika Antru īpazynuse kai vīnu nu Preiļu purpura kora dalineicu, saisteibā ar tū ari portalā lakuga.lv naseņ ir bejuse interveja ar jū.

“Jiutūs cīši gondareita, ka maņ ir izruodeita uzticeiba i dūta īspieja īsasaiteit Latgolys kulturvidis leidzradeišonā. Radzūt tū, ka “Gors” ir palics bez vadeibys, zynūt sovu pīredzi, redziejumu i gribiešonu pasorguot myusu Latgolys identitati i turēt tū augstā cīnā, es spieru sūli, kuru redzieju kai svareigu i nūzeimeigu kai Latgolys i Latvejis kontekstā, tai ari nu sovys kai Latgolys patriotis pusis. Da šam es beju koncertzālis apmaklātuoja i entuziaste, ari es uzatrauču i leidzpuordzeivuoju “Gora” liktiņam. Saprūtūt, ka mes ari atsarūnam patuoli nu Latvejis centra, kur ir daudz leluokys cylvākresursu īspiejis i daudz vairuok specialistu, kaidā mārā skaiteju tū par sovu pīnuokumu – ka es asu ite, radzu, ka varu paleidzēt i likt lītā sovys zynuošonys, kab styprynuot myusu vierteibys, tod maņ tys ir juodora,” doluos Antra. Jei ari atkluoj, ka tikai sēdis dīnā dazynuojuse par faktu, ka jau 23. oktobrī ir juobyut īsnāgtam kapitalsabīdreibys budžetam. “Itys fakts mani dareja bažeigu, tok es uzatycu, ka niulejuo vaļdis lūcekle, kura pylda itūs pīnuokumus, jau byus īsuokuse dorbu. Cikom es, nu sovys pusis, mekliešu īspiejis vēļ pyrma oficialuos stuošonuos dorbā izrunuot svareiguokuos lītys i saprast, kaids ir redziejums iz prīšku,” doluos Antra Skutele.

Vystik pošvaļdeibys izsludynuotuos uorkuortys sēdis pamatuojums arviņ palīk naskaidrys, kam, kai jau mynāts, SIA “Austrumlatvijas koncertzālei” kai sevkurai pošvaļdeibys kapitalsabīdreibai da 23. oktobra ir juoīsnādz budžets. Vys jaunuo vaļdis lūcekle Antra Skutele sovu dorbu suoks 15. oktobrī, attīceigi nedelis laikā izstruoduot tik lelys kapitalsabīdreibys budžetu byus vysā gryuts aizdavums.

Kulturys ministrejis uorštata padūmnīks juridiskajūs vaicuojumūs Gaidis Bērziņš skaidroj, ka trešajam Saeimys lasejumam, kod vajadzātu pījimt ar “Gora” puorvaļdeibu saisteitū lykumprojektu, vajadzātu byut nuokušajā Saeimys sēdē, catūrtdīnē, 15. oktobrī. Vys jis ari pastreipoj, ka parlaments itūšaļt kavejās par vīnu sēdi, deļtuo lykumprojekta izskateišona varātu tikt puorcalta. Jis skaidroj, ka Rēzeknis pošvaļdeiba beja informāta par lykumprojekta vierzeibu i tuo kuorteibu, kai i tū, ka vaļdis lūceklis tiks īcalts pyrma lykumprojekta stuošonuos spākā, Kulturys ministrejai byus tīseibys viertēt kandidata atbiļsteibu omotam. Gaidis Bērziņš paskaidroj, ka juridisku šķieršļu pījimt omotā jaunu vaļdis lūcekli pošvaļdeibai nabeja, vystik nu pošvaļdeibys pusis, zynūt lykumprojekta vierzeibys gaitu, nav īvāruots lobys puorvaļdeibys princips.