Sveicīņs nu Rēzeknis!

Rēzeknis gaisā jiutams rudiņa i jaunuo Atbreivuošonys alejis asfalta smuords. Ir atsasuocs jauns vuiceibu gods škoļnīkim, studeju gods – studentim, dorba gods školuotuojim i docātuojim. Nedelis vydā bīdreibys “Latgolys Studentu centrs” (LgSC) Rēzeknis birojs sauce studentus, škoļnīkus i cytus interesentus iz “LgSC sasavasaluošonu”.

Pasuokuma laikā ar biļžu kinys paleidzeibu tyka atguodynuoti pārnuo vuiceibu goda dorbi, pasuokumi, nūtykumi. Piečuok jaunīši dalejuos sovūs stuostūs par kotra vosorys nūtykumim, sasnīgumim, veiksmem i pīredzi. Tyka planavuoti jauni pasuokumi, projekti, aktivitatis LgSC jaunīšu daleiba Rēzeknis Augstškolys (RA), Rēzeknis piļsātys i.c. reikuotojūs pasuokumūs.

Pa vosoru LgSC Rēzeknis birojs ir puorsacieļs iz sūpluok ustobu ar numeri 314., kas ir ari RA Humanitārūs i juridiskūs zynuotņu fakultatis studejūšu pošpuorvalde. LgSC Rēzeknis biroja adress tāņ ir Atbreivuošonys aleja115-314.

Nu septembra LgSC Rēzeknis birojam ir jauna vadeituoja – Inga Grīnbauma. Par sevi Inga soka tai: „filologs i folklorists dvēselē i dorbā, mozu i na tik mozu bārnu latgaliskū tradiceju školuotojs, kur ta cīši skaļa, kur ta klusa… troks doncuotojs i vēļ trokuoks dzīduoutojs. Sapynej par etnografejis profeseji i divim godalaikim Latgolā – zīmu i vosoru.
LgSC – jauns horizonts, jauna īspieja dareit lobys i produktivys lītys. Sovu spāku puorbaude, jaunu projektu, latgaliskū dūmu aktualiziešuona. Paļdis par dūtū īspieju byut itymā komandā! Vīnvuordsokūt – prīks sasastrodot i sapyneit kūpā ar jiusim.”

Kab Ingai i LgSC izadūd eistynuot sovus mierkus i miseju, kas veļ aiz vin ir popularizeit i veicynuot Latgolys nūvoda kuļturvidis, ekonomiskuos i socialuos vidis atteisteibu, koordinēt ar tū saisteitūs projektu izstruodi i realiziešonu.

Ar rudineigim sveicīnim –

Dagneja (bejušuo LgSC Rēzeknis biroja vadeituoja)