Rokstu sagataveja: portals lakuga.lv

Latgolys regionaluo televizeja (LRT) nūslādz raidejumu cyklu “Latgales pūra lāde – atdzimšana II”, kas veļteits Latgolys kulturys montuojuma, senejūs tradiceju i tūs saglobuotuoju īpazeišonai. Raidejumūs teik atkluots, kai viesturyskuos zynuošonys i prasmis teik saglobuotys i pīlāguotys myusu dīnom, kai ari īpazeiti cylvāki, kuri sovu laiku i dorbu veļtej Latgolys kulturviesturyskuo montuojuma saglobuošonai i nūdūšonai paaudzem iz prīšku.

Raidejumu cykla catūrtais raidejums byus veļteits senejūs latgaļu viesturis i dzeivisveida atdzeivynuošonai Kroma kolnā Kruoslovys nūvodā. Ite bīdreiba “Kroma kolna bruoliste” jau vaira nakai desmit godu taisa 9.–13. godu symta senejūs latgaļu kūka piļs atdarynuojumu, reizē izzynojūt tuo laika amatnīceibu, tradicejis i ceiņu prasmis. Raidejumā skateituoji īpazeis bīdreibys vadeituoju Aleksandru Lubānu, kura aizaraušona ar senejūs latgaļu viesturi palykuse par pamatu ituos īceris eistynuošonai.

Kūpā ar Aleksandru Lubānu raidejumā tiks izzynuots, kai rodusēs ideja par Kroma kolna veiduošonu, kai godu gaitā atsateistejuse piļs i kaidys zynuošonys i prasmis vajadzeigys viesturyskūs prīškmatu, apgierbu i byuvu atdarynuošonai. Aleksandrs stuosteis ari par bīdreibys dalinīku kasdīnu, īguļdeitū breivū laiku i izaicynuojumim, raugūt piec vareibys precizuok atspīgeļuot senejūs latgaļu dzeivisveidu.

Raidejumā byus vareiba īpazeit ari Kroma kolna svātkus, kurūs sasateik viesturis rekonstrukcejis entuziasti nu Latvejis i Leitovys. Skateituoji izzynuos par senejūs ceiņu rekonstrukcejom, rūtu izgataveišonu i cytom viesturyskajom prasmem, kai ari tū, kai itaidūs pasuokumūs teik popularizāts kulturys montuojums. Reizē raidejumā tiks dagrīzta viereiba tam, kas motivej Aleksandru Lubānu i juo dūmubīdrus turpynuot aizsuoktū i kaida nūzeime itaidom iniciativom ir Latgolys viesturis saglobuošonā. #SIF_MAF2026

Raidejumu cykla “Latgales pūra lāde – atdzimšana II” catūrtū raidejumu veritēs jau itū sastdiņ, 31. oktobrī, kanalā TV24 16 stuņdēs ar atkuortuojumu svātdiņ, 1. novembrī, 9 stuņdēs reitā i pyrmūdiņ, 2. novembrī, 20.30 stuņdēs, kai ari ReTV kanala vierszemis apraidē Latgolys regionalajā televizejā 2. novembrī 17.30 stuņdēs. Taipat raidejumus var atrast LRT sātyslopā, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Piļs īla 4, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz telefona numeri 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgales pūra lāde – atdzimšana II” saturu atbiļd SIA “Latgales reģionālā televīzija”. #SIF_MAF2026

Fotogalerejā biļdis nu Kroma kolna. Foto: LRT

Publikaceju apmoksoj Latgolys regionaluo televizeja