Rokstu sagataveja: portals lakuga.lv

Ituos nedelis trešdīnē, 4. novembrī, gaidoms jauns koncertizvadums “Blondais mūceklis”, kas Rēzeknis teatrī “Joriks” puļcēs kai skateituojus, tai ari daudzus zynomus latgalīšu muzikus. Jūs vydā ir ari latgalīšu hiphopa muokslineica Ūga, kura sagatavejuse kulturys īsacejumus itai nedeļai. Jei īsoka apmeklēt koncertizvadumu, kai ari sasiļdeit sirdi pastaiguos i izjuodē.

“Blondais mūceklis”

Pyrmais īsacejums nūteikti ir koncertizvadums “Blondais mūceklis”, kas ir stuosts par latgalīti Aloizu Trūpu i juo liktini. Beļeti vys vēļ daīmami ITE.

Cukra gryuds zyrgam

Es īsaceitu aizbraukt iz izjuodi zyrgu sātā “Untumi” voi ari vīnkuorši nūvest kaidu cukra gryudeņu ci burkuonu myusu zyrgim.

Arhitektura Preiļu parkā

Vēļ maņ cīši īspaideiga vīta redzīs Preiļu parks. Bez miļzeiguos piļs symtim emoceju ir vareiba nūgiut ari iz Īvys i Oduma solys i pi vacuo zyrgu staļa, kur redzim naparostu arhitekturys spāku – zyrgu golvys! I, prūtams, vēļ ari kapleica, kurā, cik nūjaušu, pat ir īspiejams tikt vydā.

Mīreiga pastaiga rudiņa dīnā ar krūzi čaja voi kakavys sasiļdeis tovu breivū dīnu i ļaus atviļkt elpu nu kasdīnys.