Svareigai, kab kaids pasoka, ka tys ir svareigai. Saruna ar komponisti Ilonu Rupaini

Svareigai, kab kaids pasoka, ka tys ir svareigai. Saruna ar komponisti Ilonu Rupaini

Intervejis autore: Renāte Lazdiņa, portals lakuga.lv

Lai ari par komponisti Ilona Rupaine sevi nasauc, muzikologis, pedagogis i Latgolys viestnīceibys “Gors” muokslinīcyskuos dalis vadeituojis pyurā ir ap 100 dzīšmu, melodeju, apdaru, aranžeju i pat kantašu, kas skaniejušys kai Ņujorkā, tai dzīšmu svātku kūpkora izpiļdejumā Mežaparkā. Ituo gods 22. novembrī nalelu daļu nu tūs varēs baudeit ari Latgolys viestnīceibā “Gors”, kur Vaļsts Akademiskais kors “Latvija” dirigenta Māra Sirmuo vadeibā koncertā “Latgolys godskuortys” izpiļdeis Ilonys Rupainis i Jura Vaivoda radeituos dzīsmis. Obeji Latgolys komponisti itymā godā jau nūsvietejuši opolys dzeivis jubilejis, i koncerts ir kai īspieja tū vēļreiz izdareit kūpā.

Dzimšonys dīna tev beja 8. junī. Kū tev pošai nūzeimoj jubilejis i kai verīs iz taidu jubileju svieteišonu?

Muns uzskots – dzeive ir juosvyn! I vysulobuok taiduos vīnkuoršuos lītuos, na jubilejuos. Bet dzeive ir juosvyn, jo tu nikod navari zynuot, cik Dīveņš tev ir atvieliejs tū svineibu laiku. I maņ ruodīs, ka vysmoz vīnu reizi dzeivē jubileja ir juonūsvyn ari kai jubileja. Es sovu nūsvinieju, kod maņ beja 50, partū itamā reizē uzskateju – ka kaids grib koč kū dareit ar munu jubileju, tod es tū ar pateiceibu pījimšu. Aprelī muzykys školā (MIKC “Latgolys Muzykys i muokslys vydsškolā” – R. L.) muna draudzine Anda Lipska, kurai es taiseju jubileju “Gorā”, kai jei saceja, smolkai atsarībe i sataiseja koncertu ar školys audzieknim. Tys beja taids skaists puorsteigums. Sovpus itys koncerts, kas byus 22. novembrī “Gorā”, sovā ziņā ir nu dirigenta Māra Sirmuo. Jamūt vārā, ka, kod jis zvaneja, beja goda suokums, kas beja taids smogs, i vyspuor itys gods nav tys vīgluokais, tod nu kai es varieju pasceit nā? I komponistam ir tei lobuo līta, ka jis var sēdēt zālē i klauseitīs, kū jis ir sastruoduojs.

“Latgolys godskuortys” – kas ir tys, kū tī klauseituoji var sagaideit?

Jamūt vārā, ka mes obeji ar Juri Vaivodu daudzi rokstom tautysdzīšmu apdaris, koncerts byus par dažaidim gūdim, puišu i meitu attīceibom, rūtuošonu, byus i kaladō, i Zīmyssvātki. Suoksim ar pavasari i nūslēgsim ar zīmu.

Kurs tev pošai ir meiluokais godalaiks?

Maņ pateik laiks storp – kod tikai suocās pavasara zaļums voi kod rudiņa gaiss tikai suoc pasaruodeit. Tys maņ pateik.

Voi itymā jubilejis godā ari caur koncertim ir saguojs atsavērt iz sovu da šam padareitū? I kas byutu tys, par kū sev grybātu izsist iz placa – itu asu izdarejuse i tys ir cīši labi!

Sevi nikod naasu skaitejuse par taidu komponistu. Suoksim ar tū, ka maņ ari nav taida pīnuoceiga komponista diploma, kab es tai sevi varātu saukt. Asu muzikologs. Dreižuok vyss, kū doru, ir taids eksperiments i intuiceja. Koč i Imants Kokars (izcyls dirigents – R. L.) sovulaik iz munu pasaceitū, ka es varbyut daudzi kū nu taidu kompozicejis profesionali specifisku lītu nazynu, nūruodeja – i labi, ka nazyni, tys tev dūd vaļu dareit, kai tu gribi. Jubilejis reizē es, taisneibu sokūt, pasavieru sovuos atviļktnēs i pīrokstūs, kū tod asu sadarejuse pa itim godim, i tūs dorbu, patīseibu sokūt, ir pīteikūši daudzi. Bet vysuleluokais kompliments komponistam jau ir tys, ka juo muzyka skaņ. Zynu, ka koč kaidys padsmit dzīsmis ir koru apritē i skaņ. I tei laikam ir muna leluokuo prīca, ka kaidam tys ir vajadzeigs, kaids tū nūviertej i pajam sova kolektiva repertuarā.

Kū tev pošai nūzeimoj tys, ka kotrūs dzīšmu svātkūs vysmoz vīna tova dzīsme izskaņ kūpkora izpiļdejumā?

Prūtams, tys sylda pošapziņu. Bet ar tom dzīsmem ir dažaidi – na vysys, pyrmkuort, ir radeitys lelai estradei, ir dzīsmis, kas vīnkuorši naskaņ voi ritmiski ir sarežgeitys. Es tik tagad pamozam suocu saprast, kas ir tuos leluos estradis specifika, kaidom juobyut tom dzīsmem. Ūtrais – tei dzīsme vysubīžuok ir koč kod seņ saraksteita, asu jau jū atlaiduse i deļtuo dīzgon vīnkuorši uztveru. Trešais – es poša dzīžu i maņ pateik byut tymā kūpkorī Mežaparkā, i tod es vysod dūmoju, ka tik apleicejim cylvākim nasaveidoj taida naveikla sajiuta, ka, par pīmāru, koč kas tī napateik voi koč kas tī naskaņ, i te pieški sauc autoru, i autors pīsaceļ. (Smejās.)

Kai ir dzīduot sovys dzīsmis?

Nu notu verūs i dzīžu taipat kai cyti. Nu nav tai, ka es zynu nu golvys sovys dzīsmis.

Esi sacejuse, ka tev pateik eksperimentēt, vysu koč kū jaunu paraudzeit i dauzeitīs pa muzyku. Bet tovs kai komponista instruments ir bolss?

Nui, vairuok vystik bolss. Es varu raksteit ari kaidim instrumentim voi klavīrem, bet vysulobuok es jiutūs, rokstūt bolsam.

Karteņā: Ilona Rupaine. Foto: Amanda Anusāne/portals lakuga.lv

Voi, struodojūt ar materialu, tu jau dzierdi, kai tys skanēs kaida konkreta kora izpiļdejumā?

Vysubīžuok maņ nav tik daudzi laika, kab es vokorā apsasāstu i dūmuotu – pīraksteišu kaidu skaistu dzīsmi. Tai nanūteik, vysmoz munā gadīnī nā. Dzīsmis pasyuta. Kaids dirigents voi kors pasyuta tev kaidu kompoziceju, i tod tu saprūti, kuram koram tu roksti – voi tu roksti Akademiskajam koram (Vaļsts Akademiskais kors “Latvija” – R. L.) voi Radejis koram (Latvejis Radejis kors – R. L.), kaidys ir juo variešonys. Voi tu roksti kaidam pošdarbeibys koram – tu saprūti, ka jam, par pīmāru, ir tikai treis tenori i tu navari tī baiguos partejis večim raksteit, i vyspuor varbyut puišus nadoli vairuokūs bolsūs i īdūd tikai vīnu melodeju. Voi tev pasoka – mums ir lobi alti, īdūd altim kaidu smukuoku parteju, bet naaizteic sopranus, mums nav pyrmūs sopranu. Asu rakstejuse ari Airys Birzinis (dirigente – R. L.) Reigys Dūma kora školys meitiņu koram. Nu tī roksti, kū gribi, tī meitinis dzīd kai laksteigolys, i vysu, kū pīraksteisi, juos var izdzīduot. Tai tei dzīsme ari veidojās.

Tev lobuok pateik struoduot ar apdarem voi vystik dorbim, kas juosuoc nu nullis? 

Maņ pateik struoduot nu nullis, bet es parosti drupeit pajamu koč kaidu paleigu – voi tys ir kaids teksta materials, melodeja, voi kaids ritmys, kas īdūd jau nuokušū impulsu.

Kab koč kas rostūs nu jauna, koč kur juorūn īdvesme i energeja. Kas ir tovi olūti?

Munā gadīnī ir diveji varianti, kū es pīkūpu, kab koč kas rostūs. Pyrmais – sev ir juodūd uzstuodejums, ka tev vajag koč kū izdūmuot. Tod tu staigoj, dūmoj, staigoj, dūmoj, deļtuo ka tev ir tys aizdavums izdūmuot. I vīnā mirklī ir tys klikškis. Bet tys nūteik tikai tod, ka ir īdūts smedzinim itys aizdavums. Ūtrais – kod tu koč kū dori, voi gruomatneicā attaisi kaidu gruomotu, izlosi koč kaidu frazi i saprūti, ka taišni tys ir tys, kas tev tagad vajadzeigs. Nu, apmāram, kai tu paprosi kosmosam, kab jis tev atbiļdātu. Tu varbyut tū naizmontuosi kai sižetu voi kai teiru tekstu, bet kai ideju, kū tuoļuok vyrpynuot.

Komponej muzyku kai tekstim latvyski, tai latgaliski. Voi sajiuti atškireibu?

Nui, nūteikti. Latgalīšu volūdā dzīsmis skaņ meikstuok, apaleigi omuleiguok. I ari latgalīšu melodejis cīši atsaškir nu puorejuos Latvejis melodeju. Ar latgaliskajom, es pat saceitu, ka rokstūt asu vaira tradicionala, bet ar latvyskajom – vaira eksperimentala. Nu, maņ tai pošai ruodīs. Tys varbyut deļtuo, ka maņ tī nav koč kaidu kanonu voi taida dasagiušona tekstam tik cīši, kai runojūt par latgaliskajom tautysdzīsmem.

Ka tev niu pasyuteitu pīraksteit koč kū muzykys formā par Latgolu, kas tys byutu?

Suoksim ar tū, ka nav īspiejami īlikt vysu Latgolu koč kaidā vīnā dorbā. I, ka ari tys skaņ drusku banalai, tok dreižuok tys byutu kai okeans iudiņa lasē, koč kaida kvintesence. Bet tys byutu uorkuorteigi sarežgeitai. Kotram jau tei Latgola ir cytaižuoka. Bet es ari dūmoju, ka tū var izdareit tikai cylvāks nu itīnis. I, lai maņ pīdūd tī komponisti, kas ir nu cytu nūvodu i ir rakstejuši latgalīšu tautysdzīšmu apdaris, reši kuruos, kai maņ ruodīs, ir taidys, kai tū dzīduotu Latgolā.

Tys, ka kasdīnā struodoj par “Gora” muokslinīcyskuos dalis vadeituoju, i vyss, kas ite nūteik, izīt caur tevi, paleidz ari, rodūt muzyku?

Ir vysaiži, reizem ir sajiuta, ka vysa kuo ir cik daudzi i cik talanteigai, ka ruodīs – nu deļkuo vēļ koč kū dareit. Tys kvantums i tys apjūms, kū mes kai latvīši asam radejuši, ir cīši lels. Tymā pošā laikā, radzūt ituos sātys resursus, radzūt ari ituos pusis cylvāku resursus i, ka vysleidza mes asam ite, Latgolā, cytaižuoki, mums ir juodūd ari koč kas nu seve kluotyn tai kulturys telpai. I nimoz tik daudzi taidu rokstūšūs, muzicejūšūs taišni kompozicejā i profesionalā leiminī dorūšūs cylvāku nav. I tod saprūti – ka tu tū vari koč kaidā veidā vēļ atbaļsteit i koč kaidu sovu pīnasumu īdūt, tod, maņ ruodīs, ka tys ir cīši labi. I es ari ceņšūs na tikai poša dareit, bet raugu uzrunuot ari sovus kolegus, kurim radzu tū kompozicejis degsmi i idejis, i jūs veikumu ari izlikt iz “Gora” skotivis.

Runojūt par kulturys izdzeivuošonu, kai verīs iz latgaliskū kulturu regionā, iz tuos kvalitati i īspiejom latgaliskajai kulturai iz prīšku?

Veidojūt Latgalīšu kulturys goda bolvu “Boņuks”, kotru godu tu jau redzi, kurys kulturys jūmys ir apdraudātuokuos voi kuruos ir perspektiva. Bet, maņ ruodīs, leluokuo suope jau ir par tim cylvākim – ka mes nasarūnam vairuok, kas dora, ka mes vystik īmam taidā mozumā. I kū mozuok mes te palīkam, tū mozuok ari tūs, kas tū kulturu, ari taidu eistynu latgalisku kulturu, veiduos. Narunojūt jau, ka tev taipoš juobyut koč kaidom saknem, kab tu saprostu, kas i kaida ir tei latgaliskuo kultura, bet tod vēļ ari vysod tei kvalitate ir atkareiga nu kvantitatis. Tev ir juobyut koč kaidam sītam, kas izsejoj tūs zalta gryudus. I, verūtīs iz tū, maņ ir drusku bažys, jo, kab izaugtu tei viersyune i izcileiba, ir juobyut daudzi kam apuškā. I maņ grybātūs, kab tys latgaliskuos kulturys lauks, nu kuo piečuok izaug tuos izcileibys, ir leluoks. Nu, kab byutu koč kaida konkurence voi vysmoz sajiuta, ka tev tai kai drupeit koč kas mīdzās viersā. Nu, par pīmāru, es cīši najiutu, ka maņ koč kas mīdzās viersā… Taipoš maņ ruodīs svareigai, ka ir na tikai cylvāki, kas roda, bet ari kas īrauga, kas provocej, kab rostūs, kas pasyuta. Ari Latgolys pošvaļdeibys voi koč kas cyts nu molys, ka jī ari pasoka, ka tys ir svareigai. Ir svareigai, ka kaids pasoka, ka tys ir svareigai. I myusu dīnuos, kod tev nu tuo vysubīžuok nav nikaidys lelys finansialys prīcys, tev vysmoz ir kaida atzineiba.


Komentari

Atbiļdēt