Pīduovojam nūsaklauseit producentu grupys SIA „Lietišķā Latgale” taiseituo raidejuma „Pi myusim Latgolā!” raidejumu par latgalīšu volūdys raksteibys formom i latgalīšu volūdys tīsiskū statusu.

Par latgalīšu volūdys papyldynuotū ortografeju stuosteis volūdneica Lideja Leikuma, sovys dūmys izsaceis ari laikroksta „Rēzeknes Vēstis” redaktore Muora Nizinska i prīsters Andrej Aglyunīts. Nu bīdreibys „As Latgolai” dybynuotuojs Arvīds Turlajs i cyti skaidruos sovys dūmys par tū, kas ir latgalīši Latvejā.

Raidejumu cykls „Pi myusim Latgolā!” teik taiseits Nacionaluos Elektroniskūs plašsazinis leidzekļu padūmis reikuotuo konkursa „Par raidejumu taiseišonu regionalajūs i vītejūs elektreoniskajūs plašsazinis leidzekļūs, kas raida radeju programys, Latgolys regionā” ītvorūs.

Raidejumu cyklu taisa producentu grupa SIA „Lietišķā Latgale”, pīaicynojūt vītejūs žurnālistus, i da ituo goda beigu planavuots sataiseit ostiņus raidejumus par Latgolys regionā aktualom i nūzeimeigom temom kai administratīvi teritorialuo reforma i tuos ītekme iz īdzeivuotuoju kasdīnu, latgalīšu volūdys aktualizaceja, tautīšu reintegraceja i cytys.

Raidejums „Pi myusu Latgolā!” skaņ pīktdinem 18:00 Latgolys Radejā, sastdinem 16:00 Rēzeknis radejis „Ef-Ei” ēterā, taipat tū var atrost i nūsaklauseit škārsteikla lopuos lakuga.lv, latgale.lv i i-rezekne.lv.

Karteņā – Lideja Leikuma, ituo goda “Vosoruošonā” Rogovkā