Itei izstuode ir stuosts par muokslineicys Mairitys Folkmanis identitatis vaicuošonu dzymtajā Latgolā. Muokslineica stuosta, ka, dūmojūt i vaicojūt sevī vierteibys, kurys jai ir vyssvareiguokuos, palykuse pi treju nadolamu – Ticeibys, Cereibys i Mīlesteibys. Par izstuodis vizualū volūdu pamatā izmontuota gleznīceiba, kas īsadorboj kūpā ar latgalīšu volūdys ritmu. Tam izvieleiti myusu dīnu latgalīšu literata, daugovpilīša Valentina Lukaševiča dzeja i vuordi nu juo sastuodeituos latgalīšu volūdys vuordineicys.

Dorbu serejā Mairitu Folkmani eipaši interesēja fakturys, kas veidojās vysaidu sluoņu – tymā skaitā skanis, viersmys, vysaidu materiala savīnuojumu rezultatā. Prīcojūtīs par linejom i kruosom, muokslineica centēs atbiļdēt iz vaicuojumu – kas jai ir svareigi, lai izdzeivuotu? Atbiļde, kū izadeve izdūmuot, ir – cereiba. Tradicionali izstuodis nūsaukumā ir īkļauts ari kaids mozuok dzierdāts vuords, itūreiz tei ir nūceja, kas latgaliski nūzeimoj cereiba.

Izstuodis nūsakuma daļa “13/14” atspūguļoj laiku, kurā topa itys “ceļuojums” – laiku, kod Daugovpilī beja apsaveramys Salvadora Dalī grafikys, kai ari nūgrīzni, kod radeiti itī dorbi.

Tikšonuos ar dorbu autori, muokslineicu Mairitu Folkmani i Valentina Lukaševiča dzejis prīšklasejumi nūtiks 14. februarī 18.00 stuņdēs LCB Periodikys laseitovā.

Ziņa sagataveita piec LCB informacejis.