Novembris Daugovpiļs teatrī bejs nūtikšonom boguots – pīdzeivuota pyrmizruode, sajimta “Spēlmaņu nakts” bolva, kai ari sagaideita Latvejis Televizejis filmiešonys grupa izruodis īrokstam.

26. novembrī Daugovpiļs teatra viesturē pyrmū reizi nūtyka muzykla bārnim pyrmizruode. O. Šapošņikova režejā radeits kruosains i dinamisks uzvadums “Leo – mozais lauva” (krīvu volūdā) par lauvāna Leo pīdzeivuojumim, izzynojūt pasauli i vaicojūt atbiļdis, kai palikt paklauseigam, pīkluojeigam i laipnam.
Muzykla pamatā izmontuota F. Tappera puosoka “Leo – mozais lauva”, kuru pats autors ir izduovuojs Daugovpiļs teatram īstudiešonai. Piec autora dūmom myusu dīnu pasaulī, kod volda vyspuorieja informacejis puorboguoteiba i pīejameiba, ir uorkuorteigi svareigi bārnim izskaidruot, kas ir lobs i kas ir slykts, kab jī tamā naapjuktu. Muzyklā īdzeivynuots pavuicūšs stuosts, kas boguotynuots ar spylgtom kruosom, myusdīneigim muzykys ritmim, golvu reibynūšom dejom, trikim i īspaideigim tārpim.
Golvonajā lūmā breineigi īsajuts jaunais akters M. Boka, kuortejū reizi aplīcynojūt Daugovpiļs teatra veiksmeigū pīredzi jaunūs talantu pīsaistē. Par skotuvis vizualū ītārpu i daudzveideigajim kostimim guoduojušys muokslineicys i scenografis I. Bermaka i A. Stabiņa, par muzykalū noformiejumu pasaryupiejuši muzykys autori H. Rigmants i V. Anselmo, sovukuort horeogrāfe ir I. Saveļjeva.
Iz skotuvis voldūšuo vitalitate sovā varā īvilynoj i mozūs skateituojus, i jūs saimis, par kū līcynoj uzvaduma laikā dzierdamī sirsneigī smīkli, sajiusmynūšī izsaucīni i dedzeigī aplausi.

“Spēlmaņu nakts 2014” svineigajā bolvu padūšonys ceremonejā, kas 23. novembra vokorā nūtyka Dailis teatrī, par 2013. / 2014. goda izruodi bārnim voi pīaugušajim atzeita Georgija Surkova izruode “Vyss ir jei” Daugovpiļs teatrī.
Latvejis profesionaluos teatra muokslys sasnāgumu apbolvuošonys ceremonejā “Spēlmaņu nakts” tyka padūtys bolvys 18 kategorejuos. Daugovpiļs teatris iz bolvu pretendēja 2 nominacejuos – Goda izruode bārnim voi pīaugušajim (izruode “Vyss ir jei” (rež. G. Surkovs)) i Goda debeja voi jaunais skotuvis muokslinīks (Miroslavs Blakunovs – Kostja izruodē “Vyss ir jei” i Georgijs Surkovs – režeja izruodē “Vyss ir jei”).

Novembrī ari piec ilga puortraukuma Daugovpils teatrī beja īsaroduse Latvejis Televizejis komanda, kab nūfilmātu Jura Joneļa izruodi “Dabaseibys pūddarneica jeb Viņa debešķības Laimesciema podniekdarbnīca”.
Tys līcynoj par Daugovpiļs teatra pīaugūšū lūmu Latvejis profesionalūs teatru vydā i napuorprūtami veicynoj teatra popularitati vaļsts mārūgā, kai ari kulturys montuojuma saglobuošonu. Eipaši zeimeigs itys fakts ir ari partū, ka izruode ir latgalīšu volūdā.
Kai atzynuse filmiešonys komanda, tod struoduot ir bejs cīši vīgli latgaliskuos vīnkuoršeibys, sirsneibys i vitalitatis dieļ. Gaidom izruodi LTV ēterā i ceram, ka sadarbeiba ar LTV byus vys aktivuoka i Daugovpiļs teatra izruodis televizejā byus radzamys bīžuok.