9. februarī 14.00 Latgolys Kulturviesturis muzejā (Atbreivuošonys alejā 102, Rēzeknē) izskanēs stuosts par skaistumu i dzeivis svieteišonu. Apmaklātuojus gaida īsapazeišona ar izstuodi “Skaistuma stāsts Rēzeknē 20. gs. 30. gados”, nadzierdāti interesanti fakti, puorsteigums i sirsneiga sasatikšona ar Zinaidys Irbis meitu, informej muzejpedagoge Inese Ločmele-Jansone.

Latgolys sirdī Rēzeknē 20. gs. 30. godūs inteligeņcis puorstuovi veiduoja daudzveideigu kulturys dzeivi, nūsastyprynuoja ekonomiskuo lobkluojeiba. Darbeibu suoce ari pyrmuo diplomātuo kosmetike Zinaida Irbe: sīvīte, kurei ar sovu personeibys šarmu i dorbu īprīcynuoja cylvākus tūlaik, nu šudiņ īdvasmoj ticēt, ka dzeivis gruomotu var radeit ar laimeigom beigom.

Itūgod Zinaida Irbe (dz. Jansons) atzeimuotu 115. godadīnu. Zinaida, pabeiguse piec jaunuokajom Parīzis, Vīnis, Berlinis mūdis tendeņcem veiduotūs 1. Latvejis kosmetikys kursus, nu Reigys puorsacēle iz Rēzekni i 1934. godā attaiseja skaistumkūpšonys kabinetu. Damys i ari kungi augstu nūviertēja vareibu apmeklēt skaistumkūpšonys salonu – sasapucēt ar vokora beauté īmesļu natryuka: nūtyka bali, karnevali, koncerti, izruodis.

Izstuodē “Skaistuma stāsts Rēzeknē 20. gs. 30. gados” apmaklātuoji atmiņai varēs nūsabiļdēt 20. gs. 30. godu stilizātā fotostendā, izzynuot tuo laika kulturys teņdeņcis, puorskaiteit povuorgruomotu smolkumu receptus i sajimt īdvasmu kosmetikis Zinaidys dzeivisstuostā. Izstuode apsaverama nu 9. februara da 9. marta.

Piec īprīkšeja dasacejuma apmaklātuojim grupuos izstuodē īspiejams nūvadeit interaktivu ekskurseju, pastuov ari vareiba nūsvieteit dzimšonys dīnu muzejā.

Īīšonys moksa iz pasuokumu : školānim, studentim– 0,80 eiro, pīaugušajim – 1,50 eiro.

Kartenis: nu Latgolys Kulturviesturis muzeja kruojuma i Aleksandrs Bondarenko