1. i 2. julī Cēsu piļs parkā nūtiks sarunu festivals LAMPA, kurymā itūgod byus ari Latgolys telts. Īīšona festivalā byus bez moksys, pi piļs parka paradzāta ari telšu piļsieteņa, viestej festivala sātys lopa.

Par Latgolys telti atbiļdeiga byus bīdreiba “Preiļi izglītotai Latvijai”. Tī kūpā saīs entuziastiski školuotuoji, omotu meistari, sabīdriski aktivi cylvāki, kab meistarklasēs i dūmu apmaiņuos dūtu pozitivus impulsus festivala apmaklātuojim.

“Dzīves garša Latgalē” teltī byus padūmuots par vysom vacuma grupom. Pavysam mozajim byus vysaidys sportiskys aktivitatis i puosoku miestarklase, jaunīšim – vareiba pīruodeit sovys zynuošonys “Olimpiadē”, bārnu vacuokim i školuotuojim – elpuošonys i relaksacejis prasmis, kū vuiceit mozajim, padūmi par bārna atbaļsteišonu školys gaituos, taipat ari nūjuošonys reits tim, kas gryb dīnu suokt sportiski. Iz nūpītnuokys nūts byus diskusejis i dūmu apmainis – par kūpīnu nūzeimi regionu atteisteibā, Latgolys īdvasmys stuostim, latgaliskū identitati. Festivala ūtrajā dīnā fokuss byus iz izgleiteibys daīmameibu Latgolā i konkretu školu pīredzis stuostim. Pyrmuos festivala dīnys vokorā byus ari vareiba baudeit daņčus i latgalīšu volūdu folklorys kūpys “Sudobri” organizātā “vakariešonā”. Bīdreiba “Preiļi izglītotai Latvijai” ar sovu pīmāru i dūmu apmaiņom aicynoj vysus uzadreikstēt, sasadorbuot, īsasaisteit i uzajimt atbiļdeibu, partū ka “vyss suocās nu myusu pošu”!