“Latgolys Studentu centrs” suoc jaunu projektu jaunīšim “Dubnys pīRoksti”
Apvīnuojūt Daugovpiļs, Vuorkovys i Leivuona nūvodus, bīdreiba “Latgolys Studentu centrs” (LgSC) suoc jaunīšu iniciativu projektu “Dubnys pīRoksti”.
Projekta golvonuo dūma ir saaicynuot jaunīšus nu dažaidu nūvodu, kab vosorys suokuos dūtūs kūpeigā pīdzeivuojumā – sešu dīnu laivu puorbraucīnī pa Dubnys upi, kuruo laikā tyktu pieteiti upis krostā asūšī kulturviesturis objekti, intervāti krosta dzeivuotoji i īsavuiceitys jaunys kompeteņcis vidis, kulturviesturis, pylsūniskuma i videografejis jūmuos. Piec laivuošonys pūsma jaunīši kūpeigim spākim veiduos karteņu izstuodi, kinu i informativū materialu par vidi, par ekspedicejis laikā pīdzeivuotū, radzātū i sajustū.
Projektā aicinuoti pīsadaleit 20 jaunīši vacumā nu 18 da 30 godu nu Daugovpiļs, Preilu, Vuorkovys i Leivuona nūvodu. Kab dasasaceitu ekspedīcejā/apvuiceibuos, jaunīšim juoaizpylda dasacejuma anketu. Golvonais atlasis kriterejs – jaunīšu motivaceja pīsadaleit, vuiceitīs i īsasaisteit rezultatu izveidē.
Projekts nūtiks nu maija da novembra, tuo laikā tiks organizāta laivuošona pa Dubnys upi pūsmā nu Vyšku da Leivuona (13.-18.06.2017.), bet rudinī tiks izveiduota karteņu izstuode, prezentāta kina i informativais materials.
Projekta dalinīki vuiceisīs i stroduos treis grupuos: 1. grupa byus atbiļdeiga par vidis (upis) fiziogeografiskū raksturuojumu (aprokstu veiduošonu par Dubnā augušajim augim, zivim, iudiņa kukainim i.c.). 2. grupa byus atbiļdeiga par kulturviesturiskūs objektu apsavieršonu, aprokstu veiduošonu par nūteiktajim objektim, Dubnys krostu dzeivuotoju interviešonu, par tū, kai jī sadzeivoj ar upi, kai mainejusēs jūs dzeive dažaidūs laikūs i dažaidu varu ītekmē. 3. grupa byus atbiļdeiga par fotografiešonu i video filmiešonu, montažu i karteņu izstuodis i kinys izveiduošonu i prezentiešonu.
Vaira dazynuošonys par projektu var īgiit LgSC i pi projekta sadarbeibys partneru: Vyšku jaunīšu centrā, Vuorkovys nūvoda Kulturys centrā, Preiļu jaunīšu centrā “ČETRI”, Leivuona jaunatnis iniciativu centrā “Kvartāls”.
Projekts teik eistynuots ar LR Kulturys ministrejis i bīdreibys “Dienvidlatgales NVO atbalsta centrs” atspaidu.
Vaira dazynuošonys: “Latgolys Studentu centrs” sātys lopā (lgsc.lv), zvonūt 28362243 (Dagneja) voi rokstūt daugovpils@lgsc.lv
