16. septembrī Reigā, muzykys nomā “Daile”, paradzāts postfolklorys grupys “Rikši” lelkoncerts “Sieju sovu”, viestej informaceja muzykys noma sātyslopā.

Latgolys jaunīšu postfolklorys grupa “Rikši” eistineibā ir rodusēs Reigā. Tūreiz, pyrma gondreiž septeņu godu, Reigys folkklubā nūtyka grupys pyrmais koncerts, kai ari vairuokys nuokušuos spieliešonys. Ari tuoluokī celi bīži ir saistejušīs ar golvyspiļsātu – dažaidūs koncertūs i daņču vokorūs i festivalā “Gaviles”, i Leigū naktī Dzagiužkolnā, taipat ari Iļgucīmā, Zīmeļbluozmā, Mežaparkā i cytur. Niu ir daguojs laiks Reigys lelkoncertam – “Rikši” ar programu “Sieju sovu” uzastuos muzykys nomā “Daile”.

“Taida jau ir tei tautysdzīsme. Vīna, bet kotram sova…” taidi vuordi atrūnami grupys ūtruo albuma “Sieju sovu” dasacejumā. Tī ir mekliejumi, i tys ir ceļš. Laiks, kod “Rikši” vaicoj jaunu skaniejumu vijūlis, akordeona, gitarys, basgitarys, bubyna i pīcu bolsu kūpumam, kai ari cytu redzīni par tradicionaluos muzykys montuojumu. Tolkā īt Rēzeknis Kulturys noma folklorys kūpys “Rūta” sīvys, nu kurūs īvuokts lels Rēzeknis pusē dzīduotūs dzīšmu pyurs, nu tūs atlaseitys “Rikšim” mīluokuos i izveiduotys sovys aranžejis. Albumā jiutams dualisms – īrostais grupys skaniejums mejās ar jaunu, jautreiba mejās ar dziļdūmeigom atkuopem. Taipat kai albuma nūsaukums – kotrys pats var izavielēt, par kū eisti ir “Sieju sovu”. Voi dūmuoti jauni mozgi tradicionalajā muzykā, voi ari jauni gryudi postfolklorys laukā. Tok tam vysam cauri zibsnej Latgolys jaunīšu patīsais i narymstūšais energejis spruodzīņs.

Albums “Sieju sovu” dzyma 2016. goda janvarī. Aizvadeiti treis programys lelkoncerti Latgolys viestnīceibā GORS, i beidzūt ir daguojs laiks lelkoncertam Reigā. 16. septembra vokorā byus dzierdamys i vacuos, lobuos “Rikšu” dzīsmis, i ūtrajā albumā atrūnamuos, kai ari mozuok dzierdātys dzīsmis i jaunumi.