Itymā nedelis golā, 21. i 22. oktobrī, Vileks nūvodā nūtiks tradicionaluos dzīduošonys meistarklasis, kurymuos tradicionaluos dzīduošonys školuotuojis Zanis Šmitis vadeibā dzīduotuoji varēs uzlobuot sovys dzīduošonys prasmis – pyrmuos nūdarbeibys eipaši veļteitys Škilbanu etnografiskuo ansambļa, folklorys kūpys “Ceidari” i folklorys kūpys “Upīte” dzīduotuoju prasmu uzlobuošonai, bet 22. oktobrī 14.00 Upītis Tautys nomā iz atkluotū dzīduošonys meistarklasi aicynuots kotrys grybātuojs, viestej projektu vadeituoja Edeite Husare.

Īcarātajuos dzīduošonys meistarklasēs etnomuzikologe, tradicionaluos dzīduošonys školuotuoja i dzīduotuoja Zane Šmite Škilbanu etnografiskuo ansambļa, folklorys kūpys “Upīte” i bīdreibys “Latgolys Studentu cetntrs” folklorys kūpys “Ceidari” dzīduotuojim paleidzēs kai uzlobuot dzīduošonys tehniku, tai eipaša viereiba tiks davārsta Škilbanu pusis dzīšmu repertuaram, īsavuicūt Rekovys, Škilbanu i Upītis dzīsmis.

Kotram interesentam svātdiņ, 22. oktobrī, 14.00 Upītis Tautys nomā ir vareiba pīsadaleit atkluotajā dzīduošonys meistarklasē, kurymā varēs uzlobuot tradicionaluos dzīduošonys tehniku, kai ari papyldynuot sovu dzīšmu repertuaru ar kaidu Škilbanu pusis dzīsmi. Pīsadaleišona meistarklasē ir bez moksys, pyrma tuo tik lyugums da 20. oktobra dasasaceit, zvonūt 29509672 voi rokstūt skilbanusivas@gmail.com. Eipaši aicynuoti pīsadaleit Zīmeļlatgolā (Vileks, Bolvu, Ruguoju i Baļtinovys nūvodūs) dzeivojūšī tradicionaluos dzīduošonys interesenti. Ārtuokai meistarklasis nūtikšonai vītu skaits grupā dīvamžāļ ir īrūbežuots.

Nedelis golā īcarātuos meistarklasis turpynoj pārn suoktū Zīmeļlatgolys tradicionaluos kulturys, eipaši dzīduošonys, gūdynuošonu. Ar Vaļsts kulturkapitala fonda podturiešonu pārnejā godā izguojs izdavums “Škilbanu sīvas”, kai ari nūtikuši Zīmeļlatgolys tradicionaluos dzīduošonys svātki “Dzīdat, meitas, kū gaidat!”. Itūgod, turpynojūt aktivitatis LEADER projektā “Tautas tērpu iegāde Šķilbēnu etnogrāfiskajam ansamblim” (Nr. 16-07-AL19-A019.2207-000005), Škilbanu etnografiskais ansamblis eipašu veireibu veļtej tradicionaluos dzīduošonys prasmu i tautystārpu izzynuošonys aktivitatem, īsaistūt tymuos ari cytus interesentus.