9. novembrī 12.00 Vuorkovys nūvoda Vonogūs nūtiks Juoņa Vaivoda gruomotys “Vanagu vēstures lappuses” prezentaceja.

Juoņs Vaivods ir vīns nu tūs Vuorkovys nūvoda dzeivuotuoju, kurs ar sovu aktivū dorbuošonūs kulturviesturis jūmā ir labi zynoms na tik nūvodā, bet ari aiz tuo rūbežu. Juo lobūs dorbu sarokstā ir sovys dzymtys i Vonogu apleicīnis viesturis pieteišona, dokumentu vuokšona, interveju veikšona, gruomotys “Vanagu vēstures lappuses” raksteišona. Ar sovu aktivū darbeibu kulturviesturis jūmā Juoņs Vaivods aicynoj apleicejūs īpazeit pošim sovu dzymtu, sovu cīmu i sovu nūvodu, byut sovys zemis patriotim i pa eistam mīļuot dorbu.

Gruomotys saturu veidoj pošu nūvoda cylvāku radzātais, dzierdātais i stuosteitais. Atmiņu stuostu i karteņu pavodūšais emocionalais fons i detalis ļaun paruodeit gruomotā atainuotuos nūtikšonys it kai nu īškpusis, īvadūt skaiteituoju viesturiskā pīdzeivuojumā.