Rēzeknē nūtiks 10. storptautyskuo latgalistikys konfereņce
30. novembrī i 1. decembrī Rēzeknē nūtiks 10. storptautyskuo latgalistikys konfereņce “Myusu dīnu latgalīšu volūda”, informej pasuokuma koordinatore Ilga Šuplinska.
Konfereņce veļteita myusu dīnu latgalīšu raksteibys pyrmuos normativuos apsprīdis 110 godu jubilejai i pošreizejuos raksteibys nūsacejumu desmit godim.
Konfereņce tiks atkluota 30. novembrī 9 stuņdēs Rēzeknis Tehnologeju akademejā. Paraleli filologu i viesturnīku referatim latgalistikys konfereņcis programā īkļautys ari diskusejis “Medeji Latgolā, tūs sasnīdzameiba i saturs”, “Latgalīšu literaturys šudiņdīna, reitdīna voi vakardīna?”, kai ari Kārļa Skalbis puorsokys “Kaķīša dzirnavas” puorlykuma latgaliski “Kačeiša patmalis” prezentaceja.
30. novembra vokorā nūtiks ari jau par tradiceju palykušais literari muzykalais Andrejdīnys pasuokums, kurā uzastuos dažaidi latgalīšu literati i muziki, kai ari tiks prezentāts Raibuo dzejūļu kruojums “Pistacejis”.
Konfereņcis dorbs turpynuosīs 1. decembrī nu 9 stuņdem reitā i tiks nūslāgta ar diskuseju “Myusu dīnu latgalīšu volūda: padareitais i doromais”, kai ari humanitaruo žurnala “Via Latgalica” (9) prezentaceju.
