Hiphopa apvīneiba “Latgalīšu reps” nu Ludzys sovus fanus turpynoj puorsteigt, klauseituoju viertiejumam nūdūdūt jaunuokū dorbu – videoklipu dzīsmei “Ceļš iz muojom”.

Dzīsmē teik aizskorts lelai daļai Latvejis dzeivuotuoju aktuals vaicuojums par dūšonūs lobuokys dzeivis mekliejumūs uors Latvejis i atsagrīzšonu sātā. Par jaunū dzīsmi autori Ivo Grigalis i Didzis Kozlovs soka: “”Ceļš iz muojom” ir kai atguodynuojums mums vysim, ka saknis, tū vītu, nu kuruos mes īmam, navar damierst, i vysi celi agri ci vālai vad iz sātu pi rodu, draugu ci meiļuotuo.”

Lelu paļdis “Latgalīšu reps” soka Altero.lv, ar kuruo atbolstu beja vareiba video fiļmēt fjordu zemē Norvegejā.

Itys ir jau trešais apvīneibys videoklips, i itūšaļt “Latgalīšu reps” aktivi struodoj pi sova pyrmuo albuma izdūšonys, dzīsmis tymā byus latgaliski. Albumā tiks īkļauta gon jaunuokuo dzīsme, gon ari par interneta sensaceju tykušais “Skots pa lūgu”.

Apvīneibys “Latgalīšu reps” jaunumim leidza var sekuot apvīneibys profilā Facebook i Instagram.