Nu 10. leidz 12. augusta Latvejis seņejuokuo piļsāta Ludza svinēs 841. dzimšonys dīnu. Svātku programai dūts latgaliskys nūsaukums “Dūd pīci Ludzā”.

Svātku programu īsuoks 10. augustā ar storpnūvodu nūvodpietnīceibys izstuodis “Latvijai 100” atkluošonu. Padūmuots ari par sportiskom aktivitatem, byus gon atkluotais handbola turnirs veirīšim i sīvītem, storptautiskuos saceņseibys svorceļšonā.

Pīktdīnis vokorpusē izklaidis bārnim i jaunīšim – bārnu kinu vokors, jaunīšu grupu koncerts “Dūd pīci Ludzā” ar “Unknown Artists”, “Piparmētra”, “Trešīs Ņūtona lykums”, “Jauda” i “Latgalīšu reps” pīsadaleišonu. Piečuok muzykals sveicīņs jaunīšim i grupys “Dzelzs vilks” uzastuošona, bet vokora nūslāgumā disco-balle kūpā ar DJ SWORD, DJ ALEXANDER i DJ Valns.

Sastdīnis reitā, 11. augustā, piļsātu mūdynuos pyutieju orkestris “Ludza”, piečuok sekuos senūs omotu dīna i svātku tierdzeņš “Dorbs dora radeituoju”, ari sastdīnē turpynuosīs sportiskuos aktivitatis – atkluotais handbola turnirs sīvītem i veirīšim, pludmalis volejbols veirīšim i sīvītem, storptautiskuos saceņseibys svorceļšonā i triatlons.

Vokorpusē piļsietnīkus i gostus prīcēs vokora koncerts, kurymā uzastuos Vydzemis kamerorkestris ar solistim Igo, Aiju Andrejevu, Ingusu Pētersonu, Agnesi Rakovsku i c. Svātku turpynuojumā zaļumbals “Ludza Latvijas simtgadei” kūpā ar šova “X-faktors” dalineicu Innu Kraliku, romantiskū Ēriku Gruzniņu, grupom “Optimisti” i “Otto”, DJ Aigaru Melni.

Ludzys piļsātys svātki nūsaslēgs 12. augustā ar atkluotū šaha turniru, atkluotū pludmalis futbola turniru i storptautiskajom saceņseibom svorceļšonā.

Pyrmū reizi Ludza raksteitajūs olūtūs mynāta 1177. godā Kijevys Ipatejis hronikā. Interesants ir fakts, ka tei ir ari vīneiguo Latvejis piļsāta, kuru īskaun pīci azari.