Roksta autors: portals lakuga.lv

Novembrī, vaļsts svātku laikā, Latvejā i dzymtajā Latgolā ar koncertim gasteja Amerikys Savīnuotajuos Vaļstīs dzeivojūšuo vejūļneica Aija Īzaka, atskaņojūt kompozicejis nu albuma “Dvieselis steigys”. Vītnē Youtube.com publicāts īroksts nu Reigys koncerta “Kino mājā”.

Gastejūt Latvejā, Aija kūpā ar cytim muzikim prezentēja programu nu albuma “Dvieselis steigys”. Albumu īspieļuojuse apvīneiba “Teksasys Latgalīši”, tymā apkūpuotys labi zynomys latgalīšu i latvīšu melodejis jaunā interpretacejā, īkļautys ari pasauļa muzykys kompozicejis. Albums “Dvieselis steigys” ir duovona Latvejis symtgadē. Ideja par albuma veiduošonu roduos Amerikys latgalīšim Teksasys štatā – muzikei i vejūļneicai Aijai Īzakai i Latvejis Republikys Gūda konsulam Pīteram Aloizam Ragaušam.

Aija Īzaka ir spieļuojuse gon bejušajam ASV prezidentam Džordžam Bušam i juo sīvai, akteram Arnoldam Švarcenegeram i cytim. Sarunā portalam lakuga.lv Aija īprīkš atkluojuse, ka vysleluokū gandarejumu roda tys, ka juos spālātuo muzyka cylvākus īprīcynoj, i naasūt svareigi, voi tys ir koncerts vacūs ļaužu pansionatā ci Ņujorkys koncertzalā.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.