Rokstu sagataveja: portals lakuga.lv

Sastdiņ, 23. martā, Vacvuorkovys Kulturys centra zalē 13.00 stuņdēs kūpeigi škūrsteisim i īpazeisim Egitys Kancānis stuostu kruojumu “Syltuo mola”. Daži jau jū ir puorskaitejuši, pīduovojam vuorkavītis Annys Vanagys puordūmys.

Pādejā laikā, maņ redzīs, ka cīši stileigs ir palics vuords “lokalpatriotisms”. Bez juo navarātu pastuovēt nivīna nūmaļuoka (ka runojam geografiski) Latvejis voi Latgolys vīta. Lokalpatriotisms ir kai ašņabolss, kas vysod sauc iz sātu. Atīt iz sātu vysmoz pa atmiņu celim.

Itys ašņabolss vejās cauri kotrai Egitys Kancānis gruomotys “Syltuo mola” rindeņai. Gruomota ir tik eista, patīsa un nasamuoksluota, kai mozs Latgolys cylvākbārns. 

Ticit maņ, nivīns cylvāks, kura dzymtys saknis īsastīp dzili Vuorkovys zemē, navar itū gruomotu laseit vīnaldzeigai. Varbyut piec cytu dūmom nacyluo Vourkova i Andeni palyka par vasalys gruomotys varūņu pasauļa centru. Voi ta nav tīsa, ka pasauļa cetrs, ap kuru vyss grīžās, atsarūn sovā sātā? 

Ari tī, kas nav vuorkavīši, pavysam nūteikti var atrast gruomotā tuos sajiutys, ka kaids bez Tovys atļaujis ir pīrakstejs Tovys dūmys. Drūsai viņ daudzi, taipat kai mozuo Egita, ir pruotavuojuši, nu kurīnis “atskrīn” teleni. Naatjamama bierneibys atmiņu daļa daudzim saistuos ar zvonim pazeistamim un napazeistamim cylvākim nu “parostuo” telefona, lai vīnkuorši iznastu kaidu cauri. Un tuos bīzuos telefonu gruomotys, kurys vēļ tūlaik naīrūbežova datu regula… Un tikpat interesantai gruomotu laseit byus ari tim, kuru bierneiba nav paguojuse laukūs, partū ka atmiņu stuosti ir tik dzeivi, ka vīnā šaļtī ļaus īsadūmuot, ka storp tim personažim varātu byut pats.

Taipat kai filmys, kuru titrūs var izlaseit “filma baļsteita patīsūs nūtykumūs”, ari gruomotys ar eistim i leidzcylvākim atpazeistamim personažim ir daudz sirsneiguokys i sirdssyltuokys. Izlosūt Egitys gruomotu, gribīs kuopt iz ustobys, lai pamaklātu, voi ari myusu sātā nav nazkod bejuse sieneišu ponna.     

Var gadeitīs, ka byus ari drupeit juopaskumst par kaidu nūtykumu, par kaidu škieršonūs, bet tys tikai aplīcynoj, ka prīceigi i skumeigi mirkli īt rūku rūkā. 

Tei “syltuo mola” myus vysod sauc… tei vīnoj… sevkurs mozs voi nu jau na tik mozs Latgolys cylvākbārns pat aiztaiseitom acim zyna ceļu iz sovu “syltū molu”… iz sovu sātu.